Barranin
Fil-Venezwela ma jitħallewx jidħlu t-trakkijiet bl-għajnuna umanitarja

Tissokta l-kriżi fil-Venezwela, bl-ewwel trakkijiet ta’ għajnuna umanitarja waslu ħdejn il-fruntiera tal-Kolombja, bit-truppi tal-Venezwela ma ħallewhomx jgħaddu.

Il-President tal-pajjiż Nicolas Maduro li għandu l-appoġġ tal-armata tal-pajjiż ma jrid ebda għajnuna umanitarja li tidħol fil-pajjiż. Il-Kap tal-Oppożizzjoni Juan Guaido li ddikjara lilu nnifsu bħala President temporanju, wissa li jekk mhux se tidħol l-għajnuna umanitarja, ħafna nies se jispiċċaw imutu.

Guaido li huwa l-kap tal-assemblea nazzjonali tal-pajjiż qal li l-Kostituzzjoni tagħtih is-setgħa li jassumi l-poter b’mod temporanju meta l-President tal-pajjiż jiġi meqjus bħala wieħed illeġittimu. Gaido sa issa għandu l-appoġġ ta’ 40 pajjiż inkluż tal-Istati Uniti, tal-pajjiżi tal-Amerika Latina u anki tal-pajjiżi Ewropej. Maduro għad għandu l-appoġġ taċ-Ċina u r-Russja.