Lokali
Fl-aħħar 3 snin 22 persuna talbu li titneħħa s-sentenza tal-Qorti minn fuq l-internet

F’dinja diġitali fejn b’għafsa ta’ ftit buttuni fuq il-kompjuter tista’ tikseb minjiera ta’ informazzjoni fuq l-internet, il-protezzjoni tad-data personali qed kulma jmur issir kwistjoni iktar delikata. Dan japplika fost oħrajn għall-ismijiet ta’ individwi fis-sentenzi tal-qorti li jinsabu on-line. Għajr f’każi deċiżi mill-Qorti tal-familja, is-sentenzi online f’Malta jiddentifikaw l-individwi bl-isem u l-kunjom li jibqgħu jiġu imperċa għal għomorhom. Il-Kummissarju għall-Protezzjoni tad-data, Saviour Cachia qal lil TVM li madankollu hemm proċedura kif individwu jista’ jitlob li s-sentenza dwaru titneħħa jekk din tkun qed tagħmillu ħsara.

Il-qrati Maltin s’issa għad m’għandhomx proċedura stabilità kif jostru l-identità ta’ individwi li jkunu ngħataw sentenza fuq reati kriminali. Fl-Ewropa jeżistu sistemi differenti; fi Spanja u l-Ġermanja, pereżempju l-ismijiet ma jissemmewx kif jiġri f’Malta fil-Qorti tal-familja. Pajjiżi oħra, inkluż, il-Qorti Ewropea tal-Ġustizzja s-sentenzi jiġu ppubblikati on line bl-ismijiet b’kollox.

Il-Kummissarju għall-Protezzjoni tad-Data Saviour Cachia qal lil TVM li jista’ jkun hemm ċirkustanzi u raġunijiet validi biex persuna titlob li sentenza fil-konfront tagħha ma tibqax online.

Saviour Cachia qal li “meta wieħed iħossu li jrid ineħħi xi ħaġa dwaru, dan jista’ japplika s-search engine fejn tkun qed tidher biex jitneħħa l-index li tirreferi għalih u jista’ japplika wkoll, fil-każ tas-sentenzi online għand organizzazzjoni tad-Direttur Ġenerali tal-Qorti, jagħmel l-applikazzjoni però din mhux bilfors titneħħa jew le allura mhux jinqata’ mir-records uffiċjali tal-qorti, imma d-Direttur Ġenerali tal-Qorti wara li jara l-każ, jiddeċiedi jekk għandux ineħħi xi referenzi għal din il- persuna jew le.

Is-Sur Cachia qal li l-uffiċċju tiegħu jkollu numru mhux ħażin ta’ talbiet saħansitra minn xhieda biex jitneħħew is-sentenzi online li fihom jissemmew. Qal li dawn il-każi jiġu deċiżi mid-Direttur tal-Qorti u l-uffiċċju tiegħu jinvestiga biss jekk u meta dawn it-talbiet ikunu rrifjutati. Huwa qal li ħafna mill-każi li kellhom jidhru li kienu sodisfatti mid-deċiżjoni tad-direttur tal-qorti għaliex ma komplewx bil-każ quddiemu.

Iċ-ċifri li TVM kiseb mill-Qorti juru li mill-2015 sal-lum, saru 22 talba biex jitneħħew sentenzi online li kollha kienu ilhom deċiżi aktar minn ħames snin. It-talbiet kollha ntlaqgħu għajr waħda minħabba li l-każ ma kienx baqa’ jiġi segwit mill-persuna li għamlet it-talba. Il-Kummissarju għall-Protezzjoni tad-data spjega li dawn id-deċiżjonijiet jittiehdu fil-kuntest tad-Direttiva Ewropea li biha persuna għandha dritt titlob li l-każ tagħha ma jibqax jitperreċ fuq l-internet.

Aħbarijiet Oħra
Storja

Heritage Malta qed tistieden lill-pubbliku u lill-veterani tal-flotta rjali Ingliża biex il-Ġimgħa li ġej jattendu għall-attività msejħa ‘memory box’ fl-istess forti li l-Ingliżi kienu iqisuh daqs li kien bastiment fil-Port…

Lokali

Is-servizz tat-Telecare reġa’ qed jopera wara li aktar kmieni kien sospiż. Fi stqarrija, is-Segretarjat Parlamentari għal Persuni b’Diżabilità u Anzjanità Attiva flimkien mad-Dipartiment tal-Anzjanità Attiva u Kura fil-Komunità rringrazzjaw lill-operatur tal-impenn…

Saħħa

Intlaħaq ftehim bejn Steward Healthcare u l-MUMN dwar id-Dipartiment tal-Fiżjoterapija fl-Isptar San Luqa. Fi stqarrija maħruġa mill-Ministeru għas-Saħħa ntqal li wara intervent mid-Deputat Prim Ministru u l-Ministru għas-Saħħa Chris Fearne, saret…

Aktar