Kronaka
Il-Pulizija bl-akbar qabda ta’ droga – mal-bettiegħ u dulliegħ isibu 200kg kannabis

Ħidma mill-Iskwadra tal-Pulizija ta’ Kontra d-Droga, ilbieraħ waranofsinhar wasslet għall-arrest tat-tliet persuni, wara sejba ta’ 200 kilogramma, raża u ħaxixa tal-kannabis. Sorsi qrib il-Korp tal-Pulizija ikkonfermaw ma’ TVM, li din hija l-ikbar qabda din is-sena.

Malti ta’ 28 sena li joqgħod San Gwann u żewġ Sqallin ta’ 30 u 31 sena għadhom qed jinżammu taħt arrest fid-Depot tal-Pulizija, b’rabta mal-ikbar qabda ta’ droga kannabis din is-sena, 200 kilogramma. Id-droga nstabet f’diversi kaxxi li kienu mimlijin bettiegħ u dulliegħ.

It-tliet persuni gew arrestati mill-Pulizija tal-Iskwadra ta’ Kontra d-Droga, il-Ħamis waranofsinhar. Huma kienu f’żewġ vannijiet li l-Pulizija kienu ilhom ħin isegwuhom. Nifhmu li l-kaxxi bil-frott u bid-droga kienu għadhom kemm waslu Malta minn Sqallija u tgħabbew fiż-żewġ vetturi, li saqu f’direzzjonijiet separati. Bil-Pulizija ssegwihom, vann minnhom twaqqaf f’Ħal Luqa, waqt li l-vann l-ieħor twaqqaf f’Ta’ Qali.

Minn tfittxija li saret fiż-żewġ vetturi, qalb il-kaxxi li kienu mimlijin dulliegħ instabet 100 kilo raża tal-kannabis; waqt li fil-kaxxi fejn kien hemm il-bettiegħ instabet 100 kilo ieħor, ħaxixa tal-kannabis.

Bis-sejba kienet infurmata l-Maġistrat Charmaine Galea li ħatret diversi esperti sabiex jassistuha fl-inkjesta.

Il-Pulizija qalet li t-tliet persuni mistennija jitressqu l-Qorti fis-sigħat illi ġejjin akkużati bl-assoċjazzjoni fl-importazzjoni u traffikar ta’ 200 kilo kannabis.

Din il-qabda qed titqies bħala waħda mill-akbar qabdiet ta’ kannabis din is-sena, wara li oħrajn, fosthom 150 kilogramma li kienu moħbija f’qiegħ u abbord vapur tal-merkanzija fi Frar; 111-il kilogramma li nstabu f’Mejju f’residenza f’Birkirkara, waqt li kien hemm sejbiet oħra kbar li kienu ivarjaw bejn 40 u 100 kilo.

Aħbarijiet Oħra
Qorti

Eman Ebejer ta’ 34 sena, tpoġġa fuq ordni ta’ probation wara li ammetta li pprova jisraq affarjiet minn karozza f’Ħal Qormi. Hu tressaq il-Qorti t-Tnejn filgħodu quddiem il-Maġistrat Gabriella Vella….

Traffiku

Il-konsum tax-xorb alkoħoliku huwa fost il-kawża komuni ta’ inċidenti fatali u serji tat-traffiku. Fl-aħħar snin il-kampaniji li jsiru f’dan iż-żmien biex ix-xorb u s-sewqan ma jitħalltux kellhom riżultati tajbin. Din…

Politika

Is-Sindku tal-Belt Valletta, Alfred Zammit, appella għall-għaqda nazzjonali u s-sens komun, fl-isfond ta’ protesti regolari. Fi stqarrija maħruġa flimkien mal-kunsilliera Laburisti, is-Sindku qal li l-komunità residenzjali fil-Belt qed tbati l-konsegwenzi,…

Politika

F’nofsinhar għalqu n-nomini għall-elezzjoni każwali fit-tielet distrett, għas-siġġu vakat minn Helena Dalli wara li inħatret Kummissarju Ewropew. L-erba’ kandidati li tefgħu in-nomina tagħhom huma Jean Claude Micallef, Edric Micallef, Sebastian…

Aktar