Ambjent
Gabriel, Victoria u Stef lura f’darhom wara li belgħu l-plastik

Gabriel, Victoria u Stef huma tlett ifkieren li ngħataw kura min-Nature Trust minħabba l-ammont ta’ plastik fl-istonku tagħhom. Dalgħodu nħelsu fil-baħar tal-Ġnejna, fejn Nature Trust tat bidu wkoll għal kampanja edukattiva dwar il-problemi mill-plastik li qed jispiċċa fil-baħar.

L-għaqda Nature Trust nediet kampanja edukattiva biex tkabbar l-għarfien dwar il-problema kbira tal-plastik fil-baħar li jispicca mhux biss fil-hut li nieklu. Il-President tan-Nature Trust, Vince Attard, saħaq li l-pubbliku għandu jifhem il-periklu tal-plastik u jara li dan ma jispiċċax fil-baħar.

“Rajna ħafna fkieren li daħlu bil-plastik fl-istonku u ħassejna li rridu nagħmlu xi ħaġa biex din il-kampanja tibqa’ sejra matul is-sajf li ġej fejn aħna bħala Nature Trust Malta u Blu Flag Malta se nkunu qed nikkordinaw kampanja ta’ tindif madwar il-Mediterran kollu,” qal Attard.

Fil-Ġnejna, aktar minn 100 student u studenta minn diversi skejjel li jipparteċipaw fil-programm Ekoskola, attendew għal attività edukattiva fejn ħadu sehem f’workshops biex ikabbru l-għarfien tal-kampanja Litter Less, waqt li għamlu tindif tal-bajja u esperjenzaw it-tluq fil-baħar ta’ tliet ifkieren li kienu għall-kura fiċ-Ċentru ta’ San Luċjan għall-ammont ta’ plastik li kellhom fis-sistema diġestiva tagħhom.

“Nippruvaw inħeġġu lit-tfal u liż-żgħażagħ jaħdmu fuq hekk, u ġejna hawnhekk biex nippruvaw nibdew aħna biex imbagħad ħaddieħor ikompli jara minn fuqna,” qalet Bethanie Gatt, studenta li tieħu sehem f’Ekoskola.

Minbarra Nature Trust, l-istudenti kienu taħt il-gwida ta’entitajiet u organizazzjonijiet oħra li lkoll huma impenjati f’din il-kampanja. Preżenti għall-attività kien hemm ukoll il-preżentatriċi Clare Agius, li ftit tal-jiem ilu tellgħet filmat fuq Facebook dwar it-tniġġis marittimu mill-plastik.

“Jiena nixtieq li l-individwi kollha li qegħdin jabitaw f’din id-dinja huma min huma ġejjin minn fejn ġejjin għandhom iħossu li din hija r-realtà tagħna għandha tkun ir-responsabilità tagħna wkoll,” qalet Agius.

Esperti fil-qasam marittimu huma tal-fehma li jekk jibqa’ ma jsir xejn biex tiġi ndirizzata l-problema tat-tniġġis mill-plastik fil-baħar, sas-sena 2050 fl-ibħra se jkun hemm aktar plastik milli ħut.

Aħbarijiet Oħra
Kultura

Statwa tal-Madonna li kellha tagħmel il-wisa’ għall-proġett tal-Kappara se tirritorna fl-inħawi f’niċċa ferm isbaħ. Ix-xogħol fil-ġebla miexi ġmielu bil-għan li fi żmien tliet xhur, fil-ġenb tal-pont ikun hemm niċċa monumentali…

Politika

Il-Kap tal-Oppożizzjoni u tal-Partit Nazzjonalista, Adrian Delia, allega li l-ħaddiema barranin qed jaħdmu b’kundizzjonijiet anqas mill-prekarjat. Waqt attività politika f’Tas-Sliema bħala parti mill-Kunsill Ġenerali, Dr Delia qal li l-Gvern qed…

Qorti

Raġel Malti talab lill-Qorti tal-Familja tagħtih il-kustodja ta’ bintu ta’ 4 snin li spiċċat tgħix fi sptar mentali fl-Iżvizzera flimkien m’ommha. Il-Qorti semgħet kif l-omm, li hija Ġermaniża, kellha problemi…

Unjoni Ewropea

Il-Gvern ħabbar li nnomina tliet kandidati għall-Qorti Ewropea tad-Drittijiet tal-Bniedem, hekk kif it-terminu tal-Imħallef Vincent A. De Gaetano se jiġi fi tmiemu lejn l-aħħar ta’ Settembru ta’ din is-sena. Fi…

Aktar