Kronaka
Ġuvni ta’ 16-il sena jinqabad iġorr id-droga u jsuq f’Birkirkara

Ġuvni ta’ 16-il sena li jgħix Birkirkara kien arrestat wara li dal-lejl intlemaħ isuq b’veloċità eċċessiva.

Kienu l-Pulizija tal-RIU li waqt ronda għall-ħabta 12.30am, innutaw vettura tat-tip Peugeot 106 għaddejja b’veloċità eċċessiva minn Triq Fleur-de-Lys lejn il-Wied ta’ Birkirkara.

Fi stqarrija l-Pulizija qalet li l-membri tal-RIU saqu għal wara l-vettura, fejn għalkemm ippruvaw jagħmlu sinjal lix-xufier biex jieqaf, dan kompla jsuq b’veloċità eċċessiva.

Ġara li meta wasal fi Triq Giovanni Papaffy, ix-xufier tilef il-kontrol tal-vettura, bil-konsegwenza li din baqgħet sejra fin-naħa l-oħra tat-triq, ħabtet ġo vettura tal-għamla Vauxhall Astra, li kienet ġejja mid-direzzjoni opposta, u baqgħet dieħla ġo arblu.

Mal-impatt ix-xufier deher joħroġ mill-vettura u jaħrab jiġri, fejn ġie arrestat ftit wara, u fuqu nstabu żewġ biċċiet ta’ borża tal-plastik li ġo fihom kien hemm sustanza suspettata droga.

Fuq il-post issejħu wkoll il-Pulizija mill-Għassa ta’ Birkirkara. Ix-xufier u l-passiġġiera tal-Vauxhall ma sofrew l-ebda ġrieħi, filwaqt li l-ġuvni ta’ 16-il sena ttieħed iċ-Ċentru tas-Saħħa tal-Mosta peress li kien ħass xi uġigħ kawża tal-impatt. Huwa ġie ċċertifikat li qed isofri minn ġrieħi ħfief.

Investigazzjonijiet tal-Pulizija għadhom għaddejjin.

Aħbarijiet Oħra
Agrikultura

“Marzu jgħidlu ikber, April iżbel u Mejju aħsad.” Hekk jgħid il-Malti għall-qamħ. Żmien il-ħsad tista’ tgħid għadda u minn għelieqi kbar lewn id-deheb illum tilmaħ għexieren ta’ balal ta’ tiben…

Parlament

Id-Deputat Prim Minsitru u Minsitru għas-Saħħa Chris Fearne qal li l-Gvern kien infurmat bil-fomm mill-Kap Eżekuttiv ta’ Steward Healthcare f’Malta dwar ix-xiri ta’ ishma ta’ shareholder Amerikan mill-istess Steward Healthcare. …

Trasport

F’toroq battala mill-vetturi matul il-pandemija jidher li l-użu tar-rota żdied, kemm bħala mezz ta’ attività fiżika imma wkoll mezz ta’ trasport alternattiv. Grupp ta’ nisa b’kollaborazzjoni mal-organizzazjoni MOVE ngħaqdu fil-kampanja ROTA…

Edukazzjoni

Il-Ministru għall-Edukazzjoni, Owen Bonnici, qal li fl-operat mill-ġdid taċ-child care centres se jinstab bilanċ bejn il-ħarsien tas-saħħa tat-tfal u l-operat ta’ dawn iċ-ċentri. Dr Bonnici qal li lest jikkunsidra ideat…

Aktar