Barranin
Ħafna insetti qed jisparixxu mid-dinja ħlief id-dubbien u l-wirdien – dawn se jkomplu jkattru

Studju xjentifiku li ġie ppubblikat f’Biological Conservation jgħid li mal-40% tal-ispeċi ta’ insetti qegħdin jonqsu drastikament madwar id-dinja kollha.

It-tibdil fil-klima, l-agrikoltura intensiva u l-pestiċidi kollha qegħdin jikkontribwixxu għall-għibien tal-insetti minn wiċċ id-dinja.

Ir-riżultati tal-istudji qed iħasseb sew lill-esperti li lkoll jafu kemm huma kruċjali l-insetti fl-ekosistema. Xi wħud huma s-sors tal-ikel għal ħlejjaq oħra mentri oħrajn idakkru mas-75% tal-frott u ħxejjex filwaqt li jżommu l-ekosistema f’bilanċ.

Jidher ukoll li l-uniċi insetti li se jirnexxielhom ikomplu jkattru aktar flok jonqsu fin-numri huma d-dubbien u l-wirdien. Aħbar li mhux se tinżel għasel ma’ xi wħud!

L-esperti qed ibassru li 40% tal-insetti se jgħaddu minn estinzjoni u dan il-proċess qiegħed jimxi b’pass mgħaġġel minħabba l-attivitajiet tal-bniedem.