Lokali
Haley Bugeja u Dejan Grech jingħataw it-trofej tal-Isportiva u l-Isportiv tas-Sena

Il-plejer internazzjonali tal-futbol Haley Bugeja u l-plejer tal-Eightball Pool Dejan Grech ingħataw it-trofej tal-Isportiva u l-Isportiv tas-Sena.

Il-preżentazzjoni tat-trofej saret fil-Berġa ta’ Kastilja, fil-preżenza tal-Prim Ministru Robert Abela u s-Segretarju Parlamentari għall-Isport, Clifton Grima.

Dan hekk kif il-61 edizzjoni ta’ SportMalta Awards Għażliet Sportivi Nazzjonali ma setgħetx issir bħas-soltu, fil-preżenza ta’ bosta sportivi, minħabba l-Covid-19.

Il-Prim Ministru Robert Abela ppreżenta t-trofej liż-żewġ sportivi u qal li dan l-unur jixhed l-impenn, il-professjonalità, u s-sagrifiċċju li jagħmlu ta’ kuljum. Saħaq li huma ta’ eżempju għal tfal u żgħażagħ oħra, li permezz tal-perseveranza u d-determinazzjoni tagħhom qed jagħmlu unur mhux biss għalihom iżda għal pajjiżna.

Is-Segretarju Parlamentari Clifton Grima qal li permezz ta’ dan l-avveniment annwali jkunu jistgħu jiġu apprezzati s-suċċessi miksuba matul is-sena li għaddiet.

Huwa saħaq li d-deċiżjoni li dan l-avveniment isir fuq skala iżgħar ittieħdet b’rispett u rikonoxximent lejn dawk l-assoċjazzjonijiet u federazzjonijiet li għamlu ħilithom u minkejja l-isfidi li ġabet il-pandemija, stinkaw biex jaraw li l-atleti tagħhom jibqgħu attivi u anke, fejn setgħu, organizzaw il-kampjonati nazzjonali rispettivi.