Ħames partiti japplikaw għar-reġistrazzjoni – tal-PL ikollha tistenna

Il-Kummissjoni Elettorali qiegħda fil-proċess biex tapprova erbgħa mill-ħames applikazzjonijiet li rċeviet sa issa biex tirreġistra l-partiti politiċi skont il-poteri ġodda li ngħatat bil-liġi tal-finanzjament tal-partiti. S’issa ġie rreġistrat partit minnhom.

Il-Moviment Patrijotti Malti sar l-ewwel partit li ġie formalment irreġistrat bħala partit politiku f’Malta skont il-liġi l-ġdida tal-finanzjament tal-partiti li permezz tagħha l-partiti politiċi jridu jiġu rreġistrati mill-Kummissjoni Elettorali.

tvm.com.mt huwa infurmat li s’issa l-Kummissjoni rċeviet ħames talbiet għar-reġistrazzjoni ta’ partiti.

Sorsi infurmati qrib il-Kummissjoni qalu li fil-ġimgħat li ġejjin, il-Kummissjoni mistennija tiffinalizza l-proċess biex ikunu rreġistrati wkoll il-Partit Nazzjonalista, l-Alternattiva Demokratika u l-Partit Demokratiku.

Jidher li l-applikazzjoni tal-Partit Laburista ltaqgħet ma’ intopp u għalissa mhux ser ikun irreġistrat sakemm il-Konferenza Ġenerali tal-Partit Laburista kmieni s-sena d-dieħla tagħmel emenda fl-istatut biex ikun konformi mar-rekwiżiti tal-liġi biex ikun irreġistrat.

Kelliem għall-Partit Laburista qal li din t-teknikalità ser tkun riżolta bl-emendi li ser jiġu approvati fil-Konferenza Ġenerali tal-Partit Laburista. Bl-emendi mitluba mil-liġi ser ikun stipulat x’jiġri mill-assi tal-partit f’każ li dan ixolji.

Sorsi qrib il-Kummissjoni Elettorali qalu lil tvm.com.mt li l-Kummissjoni kellha parir legali biex il-Partit Laburista jkun irreġistrat f’dan l-istadju bil-kundizzjoni li jagħmel l-emendi meħtieġa fl-istatut. Madankollu l-Kummissjoni jidher li ma qablitx mal-parir legali u ddeċidiet li tistenna li jsiru l-emendi qabel tikkonkludi l-proċess tar-reġistrazzjoni.

Aħbarijiet Oħra
Kronaka

Persuna ttieħdet l-isptar għall-kura wara li kienet involuta f’inċident tat-traffiku fi Triq il-Qala, f’Għajnsielem, Għawdex. L-inċident seħħ għall-ħabta tas-sitta u nofs ta’ dalgħodu meta għal xi raġuni l-persuna tilfet il-kontroll…

Tfal

Aktar minn 60 tifel u tifla li jattendu l-iscouts ta’ Tas-Sliema ngħataw opportunità oħra biex jiffurmaw il-karattru tagħhom filwaqt li jitgħallmu għadd ta’ ħiliet neċessarji għall-ħajja. It-tfal bħalissa qed iqattgħu…

MEUSAC

Fl-aħħar stħarriġ tal-opinjoni pubblika fl-Unjoni Ewropea, 82% tal-Maltin intervistati qalu li jħossu li huma ċittadini tal-Unjoni. U 76% minnhom qalu li jixtiequ jkunu jafu aktar dwar id-drittijiet tagħhom fl-Unjoni Ewropea….

Aktar