Din hija ħarsa lejn l-istejjer ewlenin fil-faċċati tal-lum.

IN-NAZZJON

IN-NAZZJON b’ritratt fil-paġna ta’ quddiem tal-Kap tal-Partit Nazzjonalista Adrian Delia bil-ġurnal jikkwota lil Dr Delia jgħid li fil-kwistjoni tal-immigrazzjoni, irridu nkunu ġusti ma’ dawk li jiolbu l-protezzjoni, sodi ma’ dawk li mhux eliġibbli għall-ażil, u ħorox mat-traffikanti kollha li jridu jirkbu fuq it-tbatijiet tal-persuni vulnerabbli.

Rapport ieħor tan-Nazzjon jgħid li l-Kummissjoni Ewropea qed tbassar li f’Malta d-daqqa ekonomika kaġun tal-imxija tal-coronavirus se tkun ta’ 5.8 fil-mija. Il-ġurnal jikkwota lill-Kummissjoni Ewropea tgħid li Malta se tiffaċċja riċessjoni u nuqqas sostanzjali fl-iżvilupp ekonomika fis-snin li ġejjin.

THE TIMES

THE TIMES b’ritratt fil-paġna ta’ quddiem tal-bajja ta’ San Ġorġ f’San Ġiljan li iktar ma jgħaddu l-ġranet iżjed qed tkun mimlija għawwiema u fir-ritratt jidhru wkoll żewġ pulizija jaraw li qed jiġu osservati r-regoli kemm biex in-nies ma jkunux fi gruppi ta’ iżjed minn erbgħa, u wkoll li jżommu d-distanza minn xulxin.

Rapport ta’ dan il-ġurnal jgħid li wieħed mill-avukati li ħadem fl-uffiċċju tal-avukat ġenerali waqt il-prosekuzzjoni ta’ Yorgen Fenech, l-allegat moħħ wara l-qtil ta’ Daphne Caruana Galizia, telaq mill-uffiċċju tal-avukat ġenerali u ngħaqad mal-avukat tad-difiża ta’ Fenech.

The Times b’rapport ieħor bid-dettalji li l-Airmalta iffinalizzat il-pjan tagħha għal wara l-pandemija. F’dan il-pjan jirriżulta li l-linja nazzjonali tal-ajru se żżomm iżjed bdoti u ħaddiema tal-ekwipaġġ minn dak li kien ippjanat oriġinarjament. Jirriżulta wkoll li l-pjan hu li sas-sajf tas-sena d-dieħla l-Airmalta tkun qed topera ħames ajruplan, minflok tnejn biss.

L-ORIZZONT

L-ORIZZONT bid-dettalji fil-paġni ta’ ġewwa, il-ġurnal għandu intervista ma’ Dr Mary Vella, il-Kummissarju għall-Anzjani, li qalet li ħafna anzjani sabu sostenn f’dan iż-żmien tal-coronavirus.

L-Orizzont ukoll tikkwota r-rapport tal-Kummissjoni Ewropea, bil-ġurnal jgħid li l-Kummissjoni qed tbassar li matul is-sena li ġejja l-ekonomija ta’ Malta se jirnexxielha tirkupra fuq id-daqqa li se taqla’ din is-sena. Il-ġurnal jgħid ukoll li l-Kummissjoni Ewropea tara lil Malta bir-raba’ l-inqas impatt fejn jidħol qgħad.

Il-ġurnal jikkwota lill-Viċi President tal-Kummissjoni Ewropea, Margarethe Vestager, tgħid li mingħajr teknoloġija ta’ app tal-mobiles biex wieħed ikun jista’ jsegwi persuni u jara kif qed jinfirex il-virus, se tkun diffiċli ħafna li s-soċjeta’ tinfetaħ għal-livell li jixtieqha l-pubbliku.

L-Orizzont bl-aħħar dettalji fuq il-bullettin mediku ta’ lbieraħ fejn is-supretendent tas-saħħa pubblika, il-professur Charmaine Gauci ħabbret żewġ każi ġodda u li fiequ erba’ oħra.

THE MALTA INDEPENDENT

THE MALTA INDEPENDENT b’ritratt fil-paġna ta’ quddiem ta’ Triq Bisazza f’Tas-Sliema bil-ġurnal jgħid li għalkemm min-nhar it-Tnejn li għadda nfteħu l-ħwienet anke li jbigħu affarijiet mhux essenzjali, il-bejgħ għadu ma qabadx ir-ritmu ta’ qabel il-pandemija.

Rapport ta’ dan il-ġurnal jikkwota lill-Ministru tal-Ekonomija, Silvio Schembri jgħid li l-VAT fuq maskri tal-wiċċ u visors se tinżel għal 5% mir-rata normali ta’ 18%. Dan se jsir permezz ta’ avviż legali.

The Malta Independent b’rapport li jikkowta statistika tal-Eurostat li turi li l-emissjonijiet tal-carbon dioxide f’Malta baqgħu dejjem jiżdiedu mill-2017. L-istatsitika turi li Malta kienet waħda minn 4 pajjiżi fejn l-iżjed li kien hemm żieda f’dawn l-emissjonijiet fl-aħħar tliet snin.