Din hija ħarsa lejn l-istejjer ewlenin fil-faċċati tal-lum.
L-ORIZZONT
L-ORIZZONT bi storja dwar ġuvni ta’ 16-il sena bl-awtiżmu u oħtu tirrakkonta kemm jispriaha, tant li tistudja dwar edukazzjoni inklussiva biex iġġib bidla fis-soċjeta’.
Rapport ta’ dan il-ġurnal jgħid li l-GWU se tkompli tagħmel ħilitha kollha biex tassigura li jitħarsu kif jixraq id-drittijiet tal-ħaddiema tal-Malta Air.
Ritratt ta’ Villa Guardamangia, fejn għamlet żmien tgħix ir-Reġina Eliżabetta t-Tieni u din id-dar għaddiet għand il-Gvern biex jirrestawraha.
THE MALTA INDEPENDENT
THE MALTA INDEPENDENT b’ritratt fil-pa[na ta’ quddiem tal-Għadira s-Safra wara li lbieraħ il-Gvern ħabbar li din iz-zona flimkien ma’ Tal-Wej fil-Mosta, Ħas Saptan f’Birżebbuġia u Wied il-Mielaħ fl-Għarb Għawdex se jkunu parti min-network tal-Unjoni Ewropea, Natura 2000.
Rapport tal-Independent jikkwota lill-Ministru għat-Trasport Ian Borg jgħid li għadha qed tkun evalwata l-possibbilita’ tal-introduzzjoni ta’ fast ferry bejn Malta u Għawdex.
Il-ġurnal b’rapport li jikkwota lill-Kap Eżekuttiv tal-Federazzjoni tal-Iskejjel tal-Ingliż, James Perry, jgħid li jekk il-Gvern iwaqqaf l-appoġġ lejn dan is-settur, hemm ċans qawwi li l-iskejjel tal-Ingliż f’pajjiżna jfallu.
IN-NAZZJON
IN-NAZZJON b’ritratt fil-paġna tal-Kap tal-Partit Nazzjonalista Adrian Delia li lbieraħ ħabbar il-pjan tal-Partit Nazzjonalista biex jiġu iffaċċjati l-isfidi u jinħolqu l-opportunitajiet għall-pajjiż. Adrian Delia qal li din se tkun politika min-nies għan-nies. Hu stieden lil kull min hu ta’ rieda tajba biex flimkien ifasslu politika biex in-nies jgħixu aħjar.
THE TIMES
THE TIMES b’ritratt fil-paġna ta’ quddiem tal-ġnien ta’ Villa Guardamangia, dik li kienet ir-residenza tar-Reġina Eliżabetta t-Tieni. Din ir-residenza se tibda tiġi restawrata minn Heritage Malta wara li l-Gvern xtraha b’5 miljun ewro.
Rapport ieħor tat-Times jikkwota studju li sar mill-Fakulta’ tal-Ħarsien Soċjali fi ħdan l-Universita’ ta’ Malta li wera li iżjed minn 90 fil-mija tan-nies li jgħixu Malta esperjenzaw solitudni matul il-pandemija tal-coronavirus.
The Times b’rapport ieħor li jgħid li l-Kap tal-Partit Nazzjonaista Adrian Delia ħabbar riforma politika li se tara 14-il grupp ta’ membri parlamentari, membri fi ħdan il-Partit Nazzjonalista u nies oħra involuti biex jaħdmu fuq temi politiċi speċifici.
