Din hija ħarsa lejn l-istejjer ewlenin fil-faċċati tal-lum.

IN-NAZZJON

IN-NAZZJON b’rapport fil-paġna ta’ quddiem bid-dettalji mill-qorti bil-ġurnal jgħid li l-pjan biex tinqatel Daphne Caruana Galizia kien sar f’Portomaso. Jgħid li wara r-rebħa elettorali tal-Partit Laburista, allegatament Yorgen Fenech ried imexxi bil-qtil b’Keith Schembri u Silvio Valletta jgħaddu l-informazzjoni.

Bid-dettalji fil-paġni ta’ ġewwa, in-Nazzjon tgħid li Dr Chris Cardona irriżenja minn Deputat Mexxej tal-Partit Laburista.

Il-ġurnal jirreferi għax-xhieda mogħtija lbieraħ fil-Qorti fl-inkjesta dwar il-qtil ta’ Daphne Caruana Galizia, bil-Partit Nazzjonalista jiddikjara li qed jagħmilha ċara li qatt ma rċieva ebda offerta jew pagament biex jimmina l-kandidatura ta’ wieħed mill-kandidati tiegħu f’xi elezzjoni jew oħra.

B’ritratt tal-Kap tal-Partit Nazzjonalista Adrian Delia qed jiħeu sehem fis-summit tal-Partit Popolari Ewropew li sar bil-video conference, il-ġurnal jikkwota lil Dr Delia jgħid li Malta ma tiflaħx aktar weħidha għat-toqol tal-immigrazzjoni. Sostna li Malta tippretendi li l-Unjoni Ewropea tgħin minnufih.

THE TIMES

THE TIMES b’ritratt fil-paġna ta’ quddiem tal-Isqof il-ġdid t’Għawdex, Anton Teuma. Il-ġurnal jgħid li Dun Anton Teuma hu Għawdxi ta’ 56 sena u kien ordnat saċerdot fl-1988.

Rapport ieħor tat-Times jikkwota l-Aġenzija Ewropea għad-Drittijiet Fundamentali li minn stħarriġ li għamlet uriet li n-nies li jgħixu Malta huma iżjed lesti jaċċettaw dik li tissejjaħ facial recognition, jiġifieri li elettronikament juru wiċċhom biex jieħdu servizzi minn kumpaniji privati. Flimkien mal-Maltin hemm iċ-Ċiprijotti li lesti jagħmlu dan ukoll.

L-ORIZZONT

L-ORIZZONT b’ritratt fil-paġna ta’ quddiem ta’ Dr Chris Cardona bil-ġurnal jgħid li l-Partit Laburista se jibda l-proċess għas-suċċessur tiegħu bħala Deputat Mexxej.

Rapport tal-Orizzont jgħid li l-proċess tal-votazzjoni għall-elezzjoni tal-Union tal-Għalliema, MUT, beda tTnejn li għadda fejn il-President Marco Bonnici ma ġiex ikkontestat f’din il-kariga. Is-sur Bonnici qal li se jkompli jagħti l-enerġija kollha tiegħu bħala President tal-MUT.

Il-ġurnal jikkwota l-ewwel kliem tal-Isqof elett t’Għawdex, Dun Anton Teuma, li ħeġġeġ lis-saċerdoti Għawdxin biex jaħdmu flimkien għar-renju t’Alla. Dun Anton teuma se jkun id-disa’ Isqof t’Għawdex.

THE MALTA INDEPENDENT

THE MALTA INDEPENDENT b’ritratt tal-isqof t’Għawdex Mario Grech qed jgħannaq lill-Isqof elett Dun Anton teuma. Il-ġurnal jgħid li fl-ewwel kelmiet tiegħu, Dun Anton Teuma kien viżibbilment emozzjonat u tkellem fuq il-bżonn li ssir ħidma flimkien.

Il-ġurnal bid-dettalji li Dr Chris Cardona irriżenja mill-kariga ta’ Deputat Mexxej tal-Partit Laburista u l-elezzjoni għal din il-kariga se ssir ix-xahar id-dieħel.