Din hija ħarsa lejn l-istejjer ewlenin fil-faċċati tal-lum.

THE MALTA INDEPENDENT

THE MALTA INDEPENDENT bid-dettalji mill-kumpilazzjoni fil-każ ta’ Yorgen Fenech, l-allegat mandant fil-qtil ta’ Daphne Caruana Galizia. Il-ġurnal jikkwota lit-tabib Adrian Vella li fix-xhieda tiegħu lbieraħ qal li kien għadda karti li tah Keith Schembri lil Yorgen Fenech.

Rapport tal-Independent jgħid li b’48 każ ġdid tal-coronavirus, it-total ta’ każ li kellha Malta issa tela’ għal 1,423.

IN-NAZZJON

IN-NAZZJON b’ritratt meħud mix-xena tad-delitt doppju lbieraħ fi Triq Locker f’Tas-Sliema fejn inqatlu żewġt irġiel. Il-ġurnal jgħid li sa lbieraħ tard bil-lejl il-pulizija ma kienet għadha arrestat lil ħadd.

Rapport ta’ dan il-ġurnal jikkwota lit-tabib Adrian Vella li fil-Qorti qal li l-allegat mandant tal-qtil ta’ Daphne Caruana Galizia, Yorgen Fenech kien qallu Jekk ninżel jien jinżel kulħadd miegħi. Dan meta t-tabib Vella tah xi karti li għaddielu miegħu l-ex chief of staff Keith Schembri.

In-Nazzjon bid-dettalji tal-aħħar każi tal-coronavirus fil-pajjiż bil-ġurnal jgħid li b’48 każ ieħor fl-ahhar sigħat, il-każi attivi issa telgħu għal 709.

MALTATODAY

MALTATODAY b’ritratt ta’ Yorgen Fenech u b’rapport mill-Qorti li jikkwota lit-tabib Adrian Vella jgħid li Fenech kien sostna li jekk jinżel hu jinżel kulħadd miegħu. Dr Vella qal li Yorgen Fenech kien qal hekk meta għaddielu karti li kien tah l-ex chief of staff Keith Schembri.

Bid-dettalji fil-paġni ta’ ġewwa, Maltatoday tgħid li 9 mill-aħħar każi rappurtati tal-coronavirus huma minn djar tal-anzjani.

THE TIMES

THE TIMES b’ritratt fil-paġna ta’ quddiem ta’ rġiel qed jippużaw għal ritratt quddiem pub fil-Belt, bil-ġurnal jgħid li dawn l-irġiel gawdew l-aħħar ftit sigħat li fihom setgħu jixorbu qabel ma ngħalqu l-bars u l-clubs bl-aħħar miżuri tal-coronavirus.

Rapport mill-Qorti jikkwota lit-tabib Adrian Vella li lbieraħ xehed fil-kumpilazzjoni tal-każ ta’ Yorgen Fenech, l-allegat mandant fil-qtil ta’ Daphne Caruana Galizia u qal li Fenech kien eċitat ħafna wara li t-tabib tah karti li kien għaddielu l-ex chief of staff Keith Schembri. It-tabib Vella qal li Fenech kien sostna Ninżel jien, jinżel kulħadd miegħi.

Rapport ieħor tat-Times jgħid li residenti ta’ hostel mitluqa ħafna qattgħu mill-inqas tliet ijiem jgħixu b’kadavru fix-xaft minħabba li kienu mbeżżgħin wisq li jċemplu lill-pulizija. Il-pulizija qed tinvestiga l-każ ta’ dan ir-raġel li nstab mejjet f’din il-hostel.

Il-ġurnal b’rapport li 9 mid-69 każ ta’ covid li tħabbru nhar it-Tnejn, huma marbuta ma’ cluster fi djar tal-anzjani.

L-ORIZZONT

L-ORIZZONT b’rapport li jgħid li l-Unjoni Ewropea se tniedi suq għad-data personali. Qed ikun propost Trusts Projects li jippromwovi t-tixrid ta’ data personali bħala dmir ċivili.

Bid-dettalji fil-paġni ta’ ġewwa, l-Orizzont tgħid li x-xahar id-dieħel se jsir summit Ewropew li jindirizza l-kriżi fi Lvant tal-Mediterran.

Rapport ieħor tal-Orizzont jikkwota lis-segretarju ġenerali tal-GWU, Josef Bugeja jiddeskrivi l-miżuri ta’ restrizzjoni mħabba mid-Deputat Prim Ministru Chris Fearne bħala miżuri li joħolqu bilanċ bejn is-saħħa u l-ekonomija.