Din hija ħarsa lejn l-istejjer ewlenin fil-faċċati tal-lum.

L-ORIZZONT

L-ORIZZONT b’ritratt fil-paġna ta’ quddiem ta’ laqgħa li saret bejn rappreżentanti tal-GWU u l-Prim Ministru Robert Abela. Din il-laqgha saret bħala parti mill-konsultazzjoniijiet ta’ qabel il-budget bis-segretarju ġenerali tal-GWU, Josef Bugeja, jgħid li s-saħħa għandha tibqa’ prijorita’, iżda saħaq fuq il-ħtieġa ta’ bilanċ bejn is-saħħa u l-ekonomija.

Bid-dettalji fil-paġni ta’ ġewwa, il-ġurnal tkellem ma’ ħabib ta’ Abel Ebube ta’ 24 sena li miet f’inċident f’maħżen l-Imġarr. Il-ħabib tiegħu iddeskrivieh bħala bnieden ġentlom u dejjem fil-ħin.

Ir-Rapporteur Speċjali għad-Drittijiet Umani tal-Bniedem tan-Nazzjonijiet Magħquda, ikkundannat il-kriminalizzazzjoni ta’ dawk li qed isalvaw il-ħajjiet fil-Mediterran.

THE MALTA INDEPENDENT

THE MALTA INDEPENDENT b’rapport fil-paġna ta’ quddiem li fih jikkwota lill-Ministru Carmelo Abela li fix-xhieda tiegħu fl-inkjesta pubblika dwar il-qtil ta’ Daphne Caruana Galizia qal li meta kien Ministru tal-Intern ma kienx ir-rwol tiegħu li jordna lill-pulizija tinvestiga.

Rapport ieħor ta’ dan il-ġurnal mill-qorti wkoll bid-dettalji ta’ xufier ta’ minibus li ntbagħat tnax-il sena ħabs wara li nstab ħati li stupra tifla ta’ tmien snin. James Grech ta’ 33 sena nstab ħati li f’Ġunju tal-2006 wettaq stupru vjolenti fuq it-tifla.

IN-NAZZJON

IN-NAZZJON b’ritratt meħud waqt li l-Kap tal-Oppożizzjoni u tal-Partit Nazzjonalista Bernard Grech ippreżenta d-dokument ta’ qabel il-budget li ħejja l-Partit Nazzjonalista. Dr Grech qal li bħala l-arkitett ewlieni tal-ekonomija moderna ta’ Malta f’waħda ibbażata fuq is-servizzi, il-Partit Nazzjonalista hu determinat li jikkontribwixxi b’mod kostruttiv għad-dibattitu nazzjonali billi joffri viżjoni ekonomika.

Rapport ieħor tan-Nazzjon bid-dettalji ta’ Taljan li tilef ħajtu fuq il-post tax-xogħol. L-inċident seħħ ilbieraħ filgħodu fiz-zona industrijali ta’ Birżebbuġa.

THE TIMES

THE TIMES b’ritratt meħud mil-ajru ta’ parti mill-Miżieb bil-ġurnal jgħid li l-Gvern iffirma ftehim mal-kaċċaturi biex dawn jingħataw iz-zoni tal-Miżieb u l-Aħrax. Il-ġurnal jgħid li dan il-ftehim kellu jiġi iffirmat għada, iżda skont il-ġurnal sar b’mod sigriet ilbieraħ.

Rapport ieħor tat-Times jgħid li l-Kummissjoni Venezja laqgħet ir-riformi li daħħal il-Gvern għas-saltna ta’ dritt iżda ikkritikat li ma saritx konsultazzjoni wiesa’ dwar dawn it-tibdiliet.