Din hija ħarsa lejn l-istejjer ewlenin fil-faċċati tal-lum.

THE MALTA INDEPENDENT

THE MALTA INDEPENDENT b’ritratt tal-membru parlamentrai Nazzjonalista Jason Azzopardi u tal-lukanda Hilton f’Tel Aviv bil-ġurnal jikkwota lil Dr Azzopardi japoloġizza u jgħid li missu aġixxa b’mod differenti fil-każ fejn is-soġġorn tiegħu f’din il-lukanda tħallset mis-sur Ray Fenech tal-Grupp Tumas fl-2017.

Rapport ieħor tal-Independent jgħid li Steward Health Care qabel fil-prinċipju mal-idea li jkollu l-impjegati tiegħu assorbiti fis-settur pubbliku. Kelliem għal Steward qal madankollu li din tkun prerogattiva tal-Gvern.

IN-NAZZJON

IN-NAZZJON b’ritratt fil-paġna ta’ quddiem tal-Kap tal-Oppożizzjoni u tal-Partit Nazzjonalista Bernard Grech li ltaqa’ mal-ħaddiema tal-lukanda Excelsior ilbieraħ. Dr Grech qal li l-pajjiż għandu jaħdem flimkien biex l-ekonomija tirpilja. Sostna li l-iktar ħaġa li l-Partit Nazzjonalista jieħu pjaċir biha hu li jkun hawn is-saħħa, ekonomija b’saħħtiha u l-ġid, biex nerġgħu mmorru lura għall-ħajja normali waqt li l-ekonomija terġa tirpilja.

Rapport tan-Nazzjon jgħid li l-ex Ministru Laburista Konrad Mizzi qed jiġi interrogat mill-Pulizija b’rabta ma’ diversi allegazzjonijiet li hu implikat fihom. Il-ġurnal jgħid li sa tard ilbieraħ filgħaxija kien rappurtat li Konrad Mizzi inżamm arrestat matul il-lejl.

Il-ġurnal b’rapport li lbieraħ l-Covid 19 ħasdet il-ħajja ta’ erba’ persuni oħra biex issa t-tota’ ta’ vittmi f’Malta tela’ għal 85.

THE TIMES

THE TIMES b’ritratt fil-paġna ta’ quddiem ta’ għalliema f’Marseille fi Franza qed inżomm kartellun bil-kelma NIKKUMBATTI, b’referenza għall-isfidi li qed jiffaċċjaw l-għallima minħabba l-coronavirus fl-iskejjel.

Rapport tat-Times jgħid li l-Pulizija qed iżżomm arrestat lill-ex Ministru Konrad Mizzi. Hu qed ikun interrogat mill-iskwadra ta’ kontra r-reati ekonomiċi fil-kwartieri tagħhom il-Ħamrun. L-interrogazzjoni mistennija tkompli matul il-ġurnata ta’ llum.

Il-ġurnal b’rapport li jgħid li l-btala li għamel f’lukanda Hilton ta’ Tel Aviv il-membru parlamentari Nazzjonalista Jason Azzopardi tikkonsisti fi ksur tal-etika parlamentari minħabba li naqas milli jirrifjuta dan ir-rigal, jew milli jiddikjarah wara. The Times tgħid li skont l-kodiċi tal-etika tal-membri parlamentari, m’għandhomx jiġu aċċettati rigali minn persuni jew negozjanti li għandhom jew kellhom interess dirett jew indirett f’leġislazzjoni quddiem il-parlament.

L-ORIZZONT

L-ORIZZONT b’ritratt tal-Ministru Byron Camilleri waqt li ġie iffirmat l-ewwel fethim kollettiv fi 22 sena għall-ħaddiema tal-Protezzjoni Ċivili.

Rapport tal-Orizzont jikkwota lill-virologu Dr Chris Barbara li qal li hu ottimist bl-aħħar żviluppi dwar it-tilqima tal-covid 19. Dr Barbara saħaq li dak ta’ Astra Zeneca u ta’ Pfizer jidhru promettenti ħafna.

Il-ġurnal b’rapport li jikkwota lil Tony Myles li tkellem fuq il-fatt li ħa l-covid 19 u anke quddiem il-fatt li aktar u aktar persuni qed jirrappurtaw li għandhom sintomi fit-tul wara li nstabu pożittivi għall-virus u wkoll wara li jkunu ġew dikjarati li fiequ. Myles qal li fuqu l-virus kien qawwi ħafna.

MALTATODAY

Sal-ħin li ġejna biex inxandru l-analiżi tal-ġurnali, il-gazzetta Maltatoday ma kinitx waslitilna.