Din hija ħarsa lejn l-istejjer ewlenin fil-faċċati tal-lum.
IN-NAZZJON
IN-NAZZJON b’ritratt fil-paġna ta’ quddiem tal-Prim Ministru Robert Abela flimkien mal-ex Ministru Konrad Mizzi bil-ġurnal jgħid li l-bejgħ tal-isptarijiet pubbliċi sar minn wara dahar il-poplu Malti, bil-Gvern kien iffirma l-MOU qabel ma saret sejħa għall-offerti tal-kuntratti.
Rapport ieħor tan-Nazzjon jgħid li l-Assoċjazzjoni Medika Maltija, MAM, appellat lill-Gvern biex jerġa jiddikjara emerġenza tas-saħħa pubblika. Qalet li l-irtirar tal-miżuri attwali f’dan l-istadju se jwasslu għal diżastru kbir fis-saħħa pubblika.
In-Nazzjon b’kummenti tal-Professur Albert Fenech li qal li wieħed jgħid li s-sitwazzjoni tal-pandemija hi taħt kontroll hi gidba. Il-Professur Fenech qal li ma tistax tfejjaq l-ekonomija jekk ma tfejjaqx lin-nies l-ewwel.
THE TIMES
THE TIMES b’ritratt fil-paġna ta’ quddiem ta’ attivisti waqt dimostrazzjoni f’Berlin li fiha saru protesti fuq il-miżuri l-ġodda imposti mill-Gvern biex irażżan l-imxija tal-coronavirus.
Rapport tat-Times jikkwota stħarrig tal-universita’ ta’ Malta li wera li terz tan-nies f’Malta jsibuha inaċċettabbli li xi ħadd mill-familja tagħhom, iben jew bint, jiżżewweġ immigrant Afrikan. Madankollu, iżjed min-nofs ta’ dawk li wieġbu qalu li ma jqisux lilhom infushom razzisti.
Il-ġurnal bid-dettalji mill-qorti tal-ex Kappillan ta’ Burmarrad, Patri Donald Bellizzi, li nstab ħati fuq abbuż sesswali ta’ minorenni. Hi ntbagħat tliet snin ħabs.
L-ORIZZONT
L-ORIZZONT b’ritratt fil-paġna ta’ quddiem li juri l-amministrazzjoni tal-GWU mal-Ministru Carmelo Abela. Il-GWU iddiskutiet mal-Ministru Abela d-direttiva li qed tipproponi l-Unjoni Ewropea dwar il-paga minima.
Rapport ieħor tal-Orizzont din id-darba mill-qorti fejn Imħallef ikkundannat l-aġir tal-ex Kappillan ta’ Burmarrad, Patri Donald Bellizzi, u weħel tliet snin ħabs wara li nstab ħati ta’ atti sesswali fuq tifel.
Il-ġurnal b’rapport ieħor li jgħid li n-numru ta’ priġunieri li qed jgħixu fil-faċilita’ korrettiva ta’ Kordin hu d-doppju ta’ dak ideali għad-daqs tal-post. Bħalissa l-ħabs hemm 900 priġunier meta b’mod ġenerali jesa’ madwar 450.
THE MALTA INDEPENDENT
THE MALTA INDEPENDENT b’ritratt meħud bid-drone, tal-oratorju tal-Knisja tal-Ġiżwiti l-Belt.
Rapport ta’ dan il-ġurnal jgħid li l-Ministeru tal-Infrastruttura iddefenda l-inawgurazzjoni ta’ progetti ta’ toroq ewlenin qabel ma dawn kienu tlestew. Il-ġurnal jgħid li l-Gvern għamel konferenzi tal-aħbarijiet li fihom inawgur proġetti li ma kinux tlestew, fosthom il-mina ta’ Santa Luċija. Triq Sant’Antnin Għajnsiele, u partijiet mill-flyovers tal-Marsa.
The Malta Independent bid-dettalji mill-Qorti tal-Patri Donald Bellizzi li nstab ħati ta’ abbuż sesswali fuq ġuvni minorenni.
