THE SUNDAY TIMES OF MALTA
THE SUNDAY TIMES OF MALTA b’ritratt fil-paġna ta’ quddiem ta’ protesta li saret ilbieraħ minn residenti ta’ Tas-Sliema u San Ġiljan minħabba l-ammont qawwi ta’ żvilupp li qed isir f’dawn iz-zoni.
Rapport ta’ dan il-ġurnal jgħid li l-pulizija qed jinvestigaw dikjarazzjoni mill-ex chief of staff Keith Schembri, li l-Kap Eżekuttiv tal-Awtorita’ tal-Artijiet, James Piscopo, ħeba 600,000 ewro f’kont offshore f’bank barra minn Malta.
The Sunday Times b’rapport li jgħid li l-Ministru tal-Finanzi Clyde Caruana jinsab kunfidenti li Malta mhux se titpoġġa fuq il-lista s-sewda tal-ħasil ta’ flus.
IT-TORĊA
IT-TORĊA b’ritratt fil-paġna ta’ quddiem ta’ presepju tipikament Naplitan u wieħed mill-pasturi hu l-Arċisqof Charles J Scicluna.
Rapport dan il-ġurnal bi storja ta’ żagħżugħ ta’ 20 sena minn pajjiż terz li kien qed jgħix m’ommu u s-sieħeb tagħha li hu Malti. Iż-żagħżugħ xtara baskett roża u libsu u minn dakinhar jidher li s-sieħeb t’ommu m’aċċettahx u xtralu biljett biex imur lura pajjiżu.
It-Torċa b’rapport li hekk kif ġimgħatejn ilu l-ġurnal ippubblika stroja dwar kif persuni b’diżabbilita’ f’Malta qegħdin jaħdmu imma qed jitħallsu paga inqas minn sħabhom, il-Ministeru tkellem mal-Kummissarju u ħeġġeġ li diskriminazzjoni bħal din tkun rappurtata.
IL-MUMENT
IL-MUMENT b’ritratt tal-Kap tal-Partit Nazzjonalista Bernard Grech ma’ Louis Galea bil-ġurnal jgħid li f’laqgħa mal-kandidati l-ġodda tal-Partit Nazzjonalista, Dr Grech appella lill-kandidati biex mhux biss juru, iżda wkoll jieħdu azzjoni li l-Partit Nazzjonalista hu wieħed differenti li lest li jisma’ u jgħin.
Rapport ieħor ta’ dan il-ġurnal jgħid li l-bord ta’ inkjesta dwar il-qtil ta’ Daphne Caruana Galizia mhux se jilħaq jisma’ x-xhieda kollha mistieqa. Il-ġurnal jgħid li l-Prim Ministru Robert Abela qed iwebbes rasu u ma jħalliex lill-bord jisma’ x-xhieda kollha.
Il-Mument b’rapport li jgħid li għall-Partit Nazzjonalista l-ħatra ta’ Edward Scicluna bħala Gvernatur tal-Bank Ċentrali hi ta’ ħsara kbira għar-reputazzjoni ta’ Malta.
MALTATODAY
MALTATODAY b’rapport li waħda mill-ikbar kumpaniji fil-qasam tal-farmaċewtika, il-kumpanija Svizzera Novartis, akkużat lill-Gvern Malti li kiser ir-regoli tal-Unjoni Ewropea fuq kif jingħataw il-mediċini.
Rapport ieħor tal-Maltatoday jgħid li waqt li iżjed minn 71 fil-mija tat-tobba tal-familja bi ħsiebhom jieħdu t-tilċima kontra l-Coronavirus, huma biss 30 fil-mija tal-istudenti li qed jitħarrġu biex isiru tobba li biħsiebhom jeħduha.
KULLĦADD
KULLĦADD b’rapport li jgħid li statistika uffiċjali tgiddeb lill-Kap tal-Oppożizzjoni Bernard Grech meta jgħid li tmien snin ilu inqas ħaddiema Għawdxin kien ikollhom jaqsmu l-fliegu biex isibu jaħdmu.
Rapport ta’ dan il-ġurnal dwar il-ħidma tad-Dwana Maltija bil-ġurnal jgħid li fi ftit aktar minn tliet snin, id-Dwana rnexxielha tinterċetta l-akbar konsenji ta’ drogi intenzjonati biex jinbiegħu lokalment jew fi triqithom għal pajjiżi oħra. Mill-2017 inqabdu b’179 miljun ewro droga.
THE MALTA INDEPENDENT ON SUNDAY
THE MALTA INDEPENDENT ON SUNDAY b’rapport li l-Universita’ Amerikana ta’ Malta rreġistrat iżjed minn ħdax-il miljun ewro f’telf fi żmien sentejn. Il-ġurnal jgħid li l-Universita’ Amerikana ta’ Malta ma qalitx kemm hemm studenti jattendu l-korsijiet.
Rapport ieħor ta’ dan il-ġurnal jikkwota lill-Kummissarju għall-Istandards, Dr George Hyzler, jgħid li l-Awtorita’ tal-Ippjanar naqset milli tieħu passi effettivi biex twaqqaf l-abbużminn qraba ta’ Ministru.
ILLUM
ILLUM b’rapport li uffiċjali tal-Banda Stella Maris se jappellaw mid-deċiżjoni tal-Prim Imħallef li lbieraħ iddikjara emenda li daħħal il-Gvern preżenti fl-2018 u li salvatilhom il-każin, bħala emenda li tmur kontra l-kostituzzjoni. Huma fakkru li ċ-ċens jagħlaq sitt snin oħra.
Bid-dettalji fil-paġni ta’ ġewwa, hemm rapporti li l-kamra tan-negozju żgħar qalet li kien hemm spinta tajba fin-negozju nhar il-Kunċizzjoni; rapport li ż-żgħażagħ, l-Għawdxin u l-ħaddiema huma l-iktar bibien li jrid iħabbat Bernard Grech jekk irid jiċċaqlaq fl-istħarriġ, u opinjonijet differenti fuq l-ewtanażja.
