IN-NAZZJON
IN-NAZZJON b’ritratt ta’ Dr Jeffrey Pullicino Orlando bil-ġurnal jgħid li l-Partit Laburista ma jridx li Pullicino Orlando jieħu post Edward Scicluna. Il-ġurnal jgħid li sorsi qrib il-Partit Laburista qalu li l-ewwel użaw lil Pullicino Orlando u issa jridu jarmuh.
Rapport tan-Nazzjon jikkwota lill-kelliem tal-Partit Nazzjonalista għaċ-ċittadinanza, Karol Aquilina, li qal li d-deċiżjoni tal-Gvern li jbiddel l-avviż legali li ġie ippubblikat ftit jiem qabel il-Milied dwar il-bejgħ taċ-ċittadinanza, hi deċiżjoni li ittieħdet mill-Gvern minħabba li nqabad jaħbi. Qal li minkejja dan, il-Gvern xorta se jibqa’ jżomm sigriet l-ismijiet ta’ dawk li jkunu xtraw iċ-ċittadinanza Maltija.
THE TIMES
THE TIMES b’ritratt tal-kju twil ta’ karozzi li nġabru lbieraħ biex jitilgħu lejn Għawdex. Il-ġurnal jgħid li dan juri li l-każi tal-coronavirus se jkunu qed jiżdiedu fil-ġranet li ġejjin.
Rapport tat-Times bid-dettalji tal-każi tal-varjant tal-coronavirus li nstabu f’Malta. Il-ġurnal jgħid li nstabu tliet każi ta’ dan il-varjant f’Malta. Tnejn minnhom waslu mir-Renju Unit, waqt li t-tielet każ għadu qed jiġi investigat.
Il-ġurnal b’rapport li jgħid li sorsi qrib il-Partit Laburista qalu li huma mħassba dwar iż-żewġ kandidati li huma eleġibbli li jieħdu post l-ex Ministru tal-Finanzi Edward Scicluna bħala membri parlamentari. Fost dawk li huma eleġibbli għall-elezzjoni każwali biex jimtela l-post ta’ Scicluna hemm l-ex sindku tar-Rabat Charles Azzopardi u l-ex membru parlamentari Nazzjonalista Jeffrey Pullicino Orlando.
L-ORIZZONT
L-ORIZZONT b’intervista maċ-Charge Nurse tal-Aġenzija għas-Servizzi Korrettivi Carol Ann Delia li qalet li l-ħidma ta’ din l-aġenzija fil-ġlieda kontra l-pandemija ħalliet il-frott hekk kfi bħalissa m’hemm l-ebda każ pożittiv għall-virus fil-ħabs.
Rapport ieħor tal-Orizzont bid-dettalji li f’Malta nstabu l-ewwel tliet każi tal-varjant il-ġdid tal-Covid 19. Dawn huma żewġ barranin li kienu ġew mill-Ingilterra, u Maltija ta’ 75 sena. Dawn il-każi ġew iżolati u jinsabu fi kwarantina.
THE MALTA INDEPENDENT
THE MALTA INDEPENDENT b’ritratt fil-paġna ta’ quddiem tas-Supretendent tas-Saħħa Pubblika l-Professur Charmaine Gauci waqt il-konferenza tal-aħbarijiet li tagħti kull ġimgħa. Ilbieraħ tħabbar li f’Malta nstabu tliet każi tal-varjant tal-coronavirus. Il-professur Gauci qalet li dawk kollha li waslu mir-Renu Unit mit-tlettax ta’ Diċembru ntalbu jerġgħu jagħmlu t-test minħabba li dan il-varjant infirex sew fir-Renju Unit.
Rapport tal-Independent jikkwota lill-Kap Eżekuttiv tal-Assoċjazzjoni Għawdxija tat-Turiżmu, Joe Muscat, jgħid li waqt li t-talba għall-akkomodazzjoni f’Għawdex minn Maltin kienet għolja waqt il-perjodu tal-festi, l-effetti ekonomiċi tal-coronavirus għadhom qed jinħassu.
