Din hija ħarsa lejn l-istejjer ewlenin fil-faċċati tal-lum.
IN-NAZZJON
IN-NAZZJON b’ritratt fil-paġna ta’ quddiem tal-Prim Minsitru Robert Abela bil-ġurnal jgħid li Dr Abela kompla jimmanipula s-sistema demokratika. B’referenza għal dak li seħħ ilbieraħ fil-Parlament fejn ftit mumenti wara li ħa l-ġurament tal-ħatra, Dr Gavin Gulia rriżenja minn membru parlamentari, b’Dr Abela jagħżel hu min se jimla dak il-post parlamentari, il-ġurnal jikkwota lill-Kap tal-Oppożizzjoni Bernard Grech jgħid li dawn huma manuvri u konferma oħra li Robert Abela jinteressah biss mill-interessi partiġġjani u waqqa’ għaż-żufjett l-ogħla istituzzjoni tal-pajjiż.
THE TIMES
THE TIMES b’ritratt fil-paġna ta’ quddiem ta’ Donald Trump li lbieraħ sar l-ewwel President tal-Istati Uniti li fuqu sarlu impeachment darbtejn.
Rapport tat-Times jgħid li Gavin Gulia irriżenja mill-Parlament ftit mumenti biss wara li nħatar membru parlamentari bil-Partit Nazzjonalista jgħid li din kienet mossa manipulattiva u li waqqgħet għaċ-ċajt lill-parlament.
Rapport ieħor tat-Times jgħid li d-djar tal-anzjani fis-settur privat huma mħassba dwar il-fatt li t-tilqim kontra l-coronavirus qed jitqassam bil-mod ħafna. Waħda mill-operaturi f’dan il-qasam sostniet li d-djar li tmexxi hi għadha ma rċevietx id-dati biex fihom l-anzjani jkunu jistgħu jitlaqqmu.
L-ORIZZONT
L-ORIZZONT b’ritratt fil-paġna ta’ quddiem ta’ l-immigranti li ntbagħatu lura f’pajjiżhom bil-ġurnal jgħid li bdiet tħalli l-frott l-ħidma fuq ir-ritorn.
Rapport tal-Orizzont jgħid li fil-persentaġġ ta’ nisa membri fil-parlament tal-pajjiżi Ewropej fl-2020, Malta ikklassifikat fil-45 post. Il-ġurnal jgħid li dan juri kemm pajjiżna għad irid jaqdef biex ikun hemm aktar bilanċ bejn is-sessi fil-parlament.
Il-ġurnal b’rapport s-segretarju tat-taqsima professjonisti, finanzi u servizzi fi ħdan il-GWU avviċinat lill-Assoċjazzjoni tal-Bankiera dwar il-membri tagħha li jaħdmu fil-banek madwar Malta u Għawdex dwar il-possibbilita’ li jitlaqqmu qabel kontra l-covid – 19.
Rapport ieħor tal-Orizzont jgħid li mara ta’ 31 sena li ta’ 16-il sena spiċċat fuq video pornografiku bla ma taf, rebħet iżjed minn 32,000 ewro f’kumpens mit-tlieta mill-ħamest irġiel li kienu involuti fit-tixrid tal-video.
THE MALTA INDEPENDENT
THE MALTA INDEPENDENT b’ritratt fil-paġna ta’ quddiem meħud bil-lejla ta’ Bieb il-Bombi fil-Floriana.
Rapport tal-Independent jikkwota lill-President tal-Assoċjazzjoni tat-Tobba, MAM, Dr Martin Balzan, jgħid li l-Gvern irid ikun iżjed trasparenti fl-programm ta’ kif qed tingħata t-tilqima tal-coronavirus. Dr Balzan qal li n-numru ta’ tilqim li qed jasal minn barra u lil min qed jingħata għandhom ikunu ippubblikati.
Il-ġurnal b’rapport li jikkwota lill-Ministru Silvio Schembri jgħid li l-vouchers li jmiss se jitqassmu ladarba s-sitwazzjoni tal-coronavirus tmur għall-aħjar u n-numru ta’ każi ta’ covid 19 jinżel sew. Il-ġurnal jgħid li oriġinarjament il-Gvern kien ippjana li joħroġ dawn il-vouchers f’nofs Jannar.
