Kullħadd
Fuq il-ġurnal storja waħda li titratta d-direzzjoni politika li qed jieħu l-Kap tal-Oppożizzjoni u Kap Nazzjonalista Bernard Grech fejn skont il-ġurnal, Dr Grech huwa nkapaċi li jiddeċiedi fuq diversi temi. Il-ġurnal jgħid li Dr Grech mhux biss baqa’ jkaxkar saqajh għal aktar minn tlett xhur biex jiddeċiedi fuq ix-shadow cabinet tiegħu iżda meta kellu jiddeċiedi spiċċa biex irtira l-pjan oriġinali li kellu. Il-ġurnal jgħid ukoll li Dr Bernard Grech huwa nkapaċi li jiddeċiedi fuq id-divorzju, stazzjonijiet politiċi, prostituzzjoni, Covid u fuq il-kannabis.
Il-Mument.
B’ritatt tal-Kap Nazzjonalista Bernard Grech, u t-titlu ‘Pass ieħor lejn paġna ġdida’, il-ġurnal jiffoka fuq id-direzzjoni tal-Partit Nazzjonalista mmexxija minn Dr Grech, issa li għamel reshuffle fix-shadow cabinet tiegħu. Karol Aquilina s-segretarju tal-grupp parlamentari Nazzjonalista qal li Dr Grech għamel bidla nterna, u dan allura jfisser paġna ġdida għall-Partit Nazzjonalista.
Fuq il-faċċata wkoll il-ġurnal b’diversi titli ta’ stejjer oħra li nsibu fuq il-paġni ta’ ġewwa, fosthom storja li tgħid li l-Gvern iħaddem elf persuna bħala konsulenti jew persuni ta’ fiduċja, kif ukoll rapport dwar l-aħħar aġġornament mediku fuq il-Covid.
Torċa.
Fuq il-faċċata storja dwar id-dritt li mpjegat jieqaf jaħdem wara li jkun għamel is-sigħat tiegħu fuq il-post tax-xogħol u mhux minħabba t-teknoloġija, il-ħaddiem ma jieqaf qatt jaħdem għax jirċievi emails u komunikazzjoni oħra wara l-ħin tax-xogħol. Dwar dan tkellem is-segretarju ġenerali tal-GWU Josef Buġeja dwar qafas leġiżlattiv dwar dan, fejn skont stħarriġ li kien ippubblikat is-sena li għaddiet mill-uffiċċju Nazzjonali tal-Istatistika, liema stħarriġ jindika li 40% tal-ħaddiema Maltin kienu ġew ikkuntattjati wara l-ħinijiet tax-xogħol tagħhom.
Storja oħra titratta dwar l-effett tat-tilqima kontra l-Covid, fejn fl-Iżrael, fejn l-għoti tat-tilqim qiegħed fi stadju avvanzat, instab li l-anzjani ta’ l fuq minn 60 sena qed jimirdu u jmutu bi tlett darbiet inqas.
Storja oħra fuq il-faċċata titratta għadd ta’ xufiera li jaħdmu mat-trasport pubbliku li qalu li jħossu li xogħlhom mhux apprezzat filwaqt li l-kundizzjonijiet tax-xogħol tagħhom tnaqqsu drastikament.
Rapport ieħor jitratta dwar il-bidla li jrid iġib il-Prim Ministru fis-settur tal-kostruzzjoni. Entitajiet stabbiliti li bi stqarrijiet uffiċjali fl-aħħar jiem ħarġu bir-reazzjoni pożittiva tagħhom. Iżda aktar minn hekk kemm persuni mill-industrija kif ukoll fil-qasam tal-attiviżmu soċjali, qed isostnu li r-rieda li qed juri l-Prim Ministru huwa nifs qawwi għall-bidla f’dan is-settur.
The Sunday Times
Fuq il-faċċata nsibu ritratt tas-Supretendent tas-saħħa pubblika Charmaine Gauci li lbieraħ ħadet l-ewwel doża tat-tilqima kontra l-Covid.
Storja oħra tgħid li Malta qed taffaċċja eżodu ta’ infermiera li qed ifittxu jmorru jaħdmu fir-Renju Unit, b’dan il-pajjiż qed jagħmel sforz kbir biex joħroġ mill-pandemija. Skont il-ġurnal mal-140 infermier diġa rriżenjaw mill-impjiegi biex imorru jaħdmu fir-Renju Unit
Storja oħra titratta dwar kif il-pulizija għaddejja b’investigazzjoni nterna wara li t-taqsima tal-EPU, l-Environment Protection Unit, li taħdem fuq kaċċa u nsib illegali, ma ressqitx diversi nies il-Qorti u li minħabba dan dawk akkużati bir-reati rnexxielhom jaħarbu mill-ġustizzja.
ILLUM
L-istorja ewlenija fil-ġurnal hija dwar Francis Żammit Dimech li jrid jibqa’ fil-kariga ta’ Segretarju Ġenerali tal-Partit Nazzjonalista u li f’Marzu li ġej se jkun qed jikkontesta għal din il-kariga.
Fuq il-faċċata wkoll mistoqsija mill-ġurnal li ttratta jekk mara għandhiex bżonn mekkaniżmu biex tidħol fil-parlament.
The Malta Independent on Sunday
Fuq il-faċċata ritratt tal-Professur Charmaine Gauci qed tingħata t-tilqima kontra l-Covid
Storja oħra tgħid li r-recordings ġodda minn priġunier Olandiż Julian Hofstra jistgħu jxekklu l-każ kontra Yorgen Fenech, il-bniedem allegat li hu l-mandant għall-qtil tal-ġurnalista Daphne Caruana Galizia. Dawn ir-recordings jikkonsistu f’konverżazzjonijiet bejn Melvin Theuma u Julian Hofstra, fejn jidher li Theuma jinstema’ jgħid affarijiet li jikkontradixxu x-xhieda tiegħu stess fil-Qorti.
Storja oħra tgħid li skont il-Ministru għall-ekonomija Silvio Schembri, wara l-aħħar ta Marzu l-Gvern qed jippjana li jimplimenta miżuri li jinkoraġġixxu t-tkabbir eknomomiku.
Maltatoday
Fuq il-faċċata storja li tgħid li dawk li jwasslu l-ikel frisk permezz tal-mutur qed jitilfu nofs il-paga tagħhom minħabba prattiċi llegali. Skont il-ġurnal għadd ta’ kumpanniji li jħaddmu ħaddiema barranin qed jiksru l-liġi, fejn qed jisirqu nofs il-pagi ta’ dawn il-ħaddiema. L-istorja akkumpanjata b’ritratt ta’ tant sewwieqa ta’ muturi li naraw iduru mal-pajjiż iqassmu l-ikel msajjar.
Storja oħra tgħid li sidien ta’ artijiet fis-Swatar qed jitolbu għal bidla fil-pjan lokali u dan biex ikunu jistgħu jiżviluppaw art agrikola li tmiss mal-by pass ta’ B’Kara. Is-sit jinvolvi medda ta’ art ta’ 123 ,000 metru kwadru.
