Barranin
Hedded lill-plejers tiegħu stess b’pistola waqt logħba futbol

Xeni mhux tas-soltu fil-futbol, hekk kif President ta’ klabb Grieg, ma aċċettax il-fatt li kien tħassrilhom gowl waqt partita futbol tas-Super League.

Il-każ seħħ ftit minuti qabel intemmet il-partita PAOK Thessaloniki u AEK Athens li kienet qed tintlagħab fl-Istadium ta’ Toumba.   Kienet logħba kumbattuta bejn Thessaloniki li jinsabu t-tielet fil-kampjonat u l-tim ta’ Ateni li jinsab fil-quċċata tal-klassifika.

Malli l-President ta’ PAOK Ivan Savvidis induna li r-referee kien ħassrilhom il-gowl ta’ Fernando Valera li bih setgħu żblokkaw ir-riżultat, ħareġ fil-ground armat b’pistola u hedded lill-plejers tat-tim tiegħu stess biex jitilqu mill-ground b’turija ta’ protesta.

Il-logħba ġiet abbandunata sagħtejn wara li ġie skurjat il-gowl, li kien hemm min qal li fil-bidu r-referee Giorgos Kominis ikkonvalidah, iżda bil-konfużjoni li nqalgħet waqt il-partita mbagħad intqal li kien imħassar.

Il-plejers ta’ Thessaloniki baqgħu fil-pitch jargumentaw dwar il-gowl imħassar fl-injury time, filwaqt li l-plejers tal-klabb rivali ħarbu jiġru lejn id-dressing rooms u baqgħu imsakkrin hemm għal ħin twil sakemm is-sitwazzjoni ġiet taħt kontroll.

Il-President tal-bianconeri Griegi ġie skortat mill-forzi tal-ordni barra l-ground, filwaqt li t-tim ta’ Ateni qal li se jirrapporta l-każ lill-Pulizija biex tieħu l-passi meħtieġa fil-konfront ta’ Savvidis.

Skont il-media barranija, ilbieraħ Savvidis ħareġ fil-pitch darbtejn akkumpanjat mill-uffiċċjali tas-sigrutà tiegħu. Fit-tieni darba li għamilha neħħa l-ġakketta u kulħadd seta’ jara li kien armat.

Uffiċċjali ta’ AEK qalu li l-ewwel darba li ħareġ fil-ground, il-President ta’ PAOK hedded lir-referee sakemm ġie skortat ‘l barra mill-pitch.  Qed ikun irrappurtat li Savvidis huwa wieħed mill-iktar nies sinjuri fir-Russja u ħabib tal-President Vladimir Putin.

Imwieled il-Ġeorġja, iżda b’ċittadinanza doppja – Griega u Russa – Savvidis xtara l-klabb ta’ PAOK Thessaloniki fl-2012 u kemm ilu fit-tmun għenhom jirbħu t-Tazza Griega l-istaġun li għadda.

Aħbarijiet Oħra
Barranin

Il-Prim Ministru Ingliża Theresa May qed tiffaċċja sejħiet biex tirriżenja minn Prim Ministru u Mexxej tal-Partit Konservattiv hekk kif ħafna Membri Parlamentari Konservattivi mhux jilqgħu l-pjan li ressqet biex ikun…

Saħħa

Pazjenti li kellhom puplesija kkawżata minn emoroġija fil-moħħ jistgħu jieħdu l-aspirina biex inaqqsu r-riskju li jerġgħu jsofru minn puplesija jew problemi f’qalbhom. L-aspirina traqqaq id-demm u t-tobba kienu kawti biex…

Barranin

Raġel fl-Italja li qabad titjira b’oħra tagħtu rasu meta nduna li niżel fl-ajruport il-ħażin. Il-każ seħħ it-Tnejn li għadda, meta minn Pisa l-passiġġier qabad titjira ta’ Ryanair lejn Bari, minflok…

Barranin

Filmati li qed iduru d-dinja, qabdu l-mument li meteora xegħlet b’dawl qawwi s-sema fl-Awstralja. Dan ġara lbieraħ filgħaxija meta bosta żoni fl-Awstralja t’isfel inħasdu hekk kif is-sema xegħlet għal ftit…

Aktar