Brexit
Helpline biex jgħin Maltin fir-Renju Unit jirreġistraw mal-Kummissjoni Għolja Maltija f’Londra

Il-Prim Ministru Joseph Muscat fil-Parlament fisser il-passi li qed jieħu l-Gvern f’każ li r-Renju Unit joħroġ mill-Unjoni Ewropea mingħajr ftehim.

Il-Kap tal-Oppożizzjoni Adrian Delia ddikjara li l-Oppożizzjoni tappoġġja l-ftehim bejn l-Unjoni Ewropeja u r-Renju Unit dwar Brexit. Huwa talab kjarifika minn għand il-Prim Ministru dwar liema kienu d-direzzjonijiet u liema kienu l-commitments fil-miżuri li semma’ l-Prim Ministru. Huwa qabel li ż-żewġ pajjiżi jzommu relazzjonijiet storiċi u b’saħħithom. Qabel li residenti Ingliżi jingħataw permess ta’ residenza għal għaxar snin u saħaq li l-Gvern għandu jinsisti li l-istess trattament jingħata lil ċittadini Maltin fir-Renju Unit.

L-avukat Delia staqsa kif id-direzzjoni tal-Gvern qed tolqot in-negozji li jridu jillokaw f’Malta. Waqt li wera dispjaċir li l-kumpanija merkantili P& O irreġistrat il-flotta tagħha f’Ċipru. Huwa staqsa wkoll dwar x’mezzi ta’ komunikazzjoni qed juża l-Gvern biex jinforma sew lis-setturi differenti milquta minn Brexit.

Mistoqsijiet oħra saru mid-deputati Robert Cutajar, Kristy Debono, Edward Zammit Lewis, Simon Busuttil, Robert Arrigo, Hermann Schiavone.

Fit-tweġibiet tiegħu, il-Prim Minsitru Muscat qal li żdied l-interess ta’ kumpaniji fl-Ingilterra li jridu jillokaw f’Malta fosthom bl-aqwa kumpaniji tal-gaming William Hill.

Huwa ħabbar li mill-ġimgħa d-dieħla se jkun hemm helpline biex jgħin Maltin fir-Renju Unit jirreġistraw mal-Kummissjoni Għolja Maltija f’Londra. Qal li se tibqa’ l-portabilità tal-pensjonijiet u residenti Ingliżi se jkunu jistgħu jikkontestaw elezzjonijiet tal-kunsilli lokali f’Malta.

Dwar telf ta’ fondi Ewropej jekk ma jintlaħaqx ftehim bejn ir-Renju Unit u l-Unjoni Ewropeja, il-Prim Ministru qal li dan se jiswa lil Malta sitt miljun ewro fis-sena għas-sentejn li ġejjin. Huwa sostna iżda li No Deal qed iwassal għal aktar investiment barranin f’Malta. Il-Gvern ħadem ukoll biex it-telf possibbli ta’ turisti Ingliżi minħabba li jiżdidulhom l-ispejjeż ikun ikkompensat b’żieda fit-turisti minn pajjiżi oħra. Malta qed tilqa’ wkoll għall-effett li Brexit ikollu fuq l-Isterlina. Qal ukoll li l-Ingliż se jibqa’ ilsien ufficjali fl-Unjoni Ewropea. Il-kwistjoni ta’ ħrug ta’ visa se jiġi deċiż fuq livell Ewropew.

Il-Prim Ministru Muscat qal li jekk ikun hemm estensjoni dan isir biex ir-Renju Unit jiċċara l-pożizzjoni tiegħu u ma jitwalx aktar mill-aħħar ta’ Mejju.

Huwa qal li Malta qed titlef l-alleat prinċipali fil-kwisjtoni tal-armonizazzjoni tax-taxxa. Iżda hemm pajjiżi oħra li jaqblu mal-qagħda ta’ Malta fosthom il-Belġju, l-Irlanda, l-Olanda, il-pajjiżi baltiċi u Ċipru. Qal li l-Gvern qed jaħdem biex ma jiżdidux b’mod sproporzjonat il-miżati għal studenti Malti li jistudjaw fl-Ingilterra.

Min-naħa tiegħu d-Deputat Prim Minsitru u Ministru tas-Saħħa Chris Fearne qal li ftehim dwar taħriġ ta’ tobba u speċjalizzazzjoni f’universitajiet u sptarijiet Ingliżi jibqgħu fis-seħħ. Malta wkoll se jkollha aċċess għaċ-ċentri ta’ eċċellenza medika Ewropea. Il-pazjenti Maltin se jibqgħu jgawdu minn servizzi mediċi fir-Renju Unit waqt li qed issir ħidma mal-Kunsill Mediku biex jitħaffef il-proċess għal speċjalisti Ingliżi biex jiġu joperaw f’Malta.

Il-Gvern ukoll sab soluzzjoni dwar madwar elfejn tip ta’ mediċina li jimporta mill-Ingilterra waqt li s-settur privat qed jaħdem għal soluzzjoni dwar xiri ta’ mediċini.

Ara wkoll:

Il-Gvern b’miżuri biex f’każ ta’ Brexit bla ftehim il-mediċini ma jogħlewx

Aħbarijiet Oħra
Infrastruttura

Il-Korporazzjoni għas-Servizzi tal-Ilma minn għada se tibda tiswijiet fis-sistema ta’ katusi f’qiegħ il-baħar li jintuża għar-rimi ta’ drenaġġ trattat mill-impjant ta’ Għawdex. Il-ħidma delikata li għandha tieħu madwar tliet ġimgħat…

Kronaka

Raġel ta’ 33 sena weġġa’ gravi f’inċident bil-mutur f’Birkirkara. Il-Pulizija kienet infurmata bl-inċident fi Triq il-Wied għall-ħabta tal-4.45pm. Fi stqarrija l-Pulizija qalet li s-sewwieq, li jgħix il-Pietà, kien qed isuq…

Saħħa

F’Malta hawn madwar 7,000 persuna li għandhom id-demenzja, bl-istudji juru li l-għadd mistenni jiżdied għal mill-inqas 13,000 sal-2050. L-esperti jemmnu li din hija biss ix-xifer tal-istampa, minħabba li għadd ta’…

Stejjer Umani

Għalkemm il-Maltin ikunu qed jistennew is-sajf bil-ħerqa biex jaqtgħu xi ftit mir-rutina ta’ kuljum tax-xogħol, mhux l-istess jista’ jingħad għal Alfred Attard li ilu aktar minn 40 sena jiġbor il-melħ…

Aktar