Lokali
70,000 persuna laqgħu s-sena l-ġdida fil-Belt Valletta

Aktar minn 70,000 Malti u turist inġabru għaċ-ċelebrazzjoni nazzjonali li ttellgħet fi Pjazza San Ġorġ u fi Triq ir-Repubblika biex jagħtu merħba lis-Sena l-Ġdida.

Il-kunċert tal-bieraħ li ġie organizzat mill-Aġenzija Kulturali għall-Belt Valletta taħt il-Ministeru għall-Ġustizzja, Kultura u Gvern Lokali kien jikkonsisti f’uħud mill-aqwa artisti lokali Maltin, b’kunċert live minn The Travellers, u kien jinkludi wkoll lil DJ Drey, Ozzy Lino and the Candy Moths, Kevin Paul, Gaia Cauchi u Kurt Calleja.

Il-Ministru għall-Ġustizzja, Kultura u Gvern Lokali Owen Bonnici qal li l-attendenza tal-bieraħ verament turi li l-pubbliku Malti japprezza avvenimenti li jġibu flimkien artisti lokali ewlenin biex jipprovdu spettaklu tal-ogħla livell lill-familja kollha. Qal li huwa importanti wkoll li ninnutaw li din iċ-ċelebrazzjoni nazzjonali kulma jmur dejjem qiegħda tikber matul is-snin, b’mod li ssaħħaħ il-kalendarju kulturali u tattira mhux biss udjenza Maltija imma wkoll turisti li jżuru Malta f’dan iż-żmien tas-sena.