Qasam soċjali
Il-bini ta’ appartamenti soċjali fiż-Żurrieq fi stadju avvanzat

Ix-xogħol tal-ġebla fil-qasam tad-djar il-ġdid li qed jinbena fiż-Żurrieq jinsab fi stadju avvanzat. Il-Ministru għall-Akkomodazzjoni Soċjali Roderick Galdes żar is-sit fi Triq Ta’ Ċiantar li qed jinbidel f’saqaf għal 25 familja fil-bżonn.

Fi stqarrija l-Gvern qal li dan il-proġett mhux biss se jkun qed joffri 25 appartament ta’ housing soċjali ġdid, iżda jinkludi wkoll 21 garaxx. L-appartamenti qed jinbnew f’sit ta’ 1,200 metru kwadru, li kollha se jkunu aċċessibbli għal persuni b’diżabbiltà.

Il-Ministru Galdes innota li l-proġetti ta’ housing soċjali ġdid imorru lil hinn mill-istandard ta’ housing soċjali tal-passat, fejn minflok proġett ikkonċentrat f’żona waħda, qed isiru binjiet iżgħar li jħallu impatt estetiku aħjar fuq iż-żona tal-madwar.

Il-Kap Eżekuttiv tal-Awtorità tad-Djar Leonid McKay qal li l-Awtorità qed tipprovdi soluzzjonijiet innovattivi għall-isfidi tal-ġurnata, waqt li fakkar fl-iskemi li introduċiet l-Awtorità fl-aħħar xhur bil-għan li tindirizza faxex differenti tas-soċjetà.