Lokali
Il-binja tal-Cafè Premier se tinbidel f’berġa u ċentru ċiviku

Sa tmiem din is-sena l-Kunsill Lokali tal-Belt Valletta se jiġi rilokat għal post ikbar, aktar ċentrali u aċċessibli fil-binja ikonika ta’ Cafe Premier li l-ħaddiema tad-Direttorat tar-Restawr ilhom madwar sena jaħdmu fuqha.

Waqt konferenza f’għeluq il-100 jum tal-Gvern, il-Ministru tal-Ġustizzja u l-Kultura, Owen Bonnici qal li b’hekk il-Gvern se jkun qed iżomm mal-wegħda li jlesti x-xogħol fil-ħin qabel Jannar li ġej meta l-Belt tkun il-Kapitali Ewropea tal-Kultura.

“Din hija ħolma li ħa ssir realtà mhux biss għar-residenti tal-Belt Valletta li dejjem xtaqu li jkollhom post ċentrali fejn jistgħu jinqdew imma anke għall-pubbliku inġenerali għax il-pubbliku inġenerali wkoll jista’ jinqeda mill-aħħar tas-sena ‘l quddiem minn dan il-post għas-servizzi tiegħu,” qal il-Ministru.

Hekk kif il-Kunsill Lokali jiċċaqlaq minn binja mhux aċċessibli fi Triq Nofsinhar għal din il-binja, minnufih se jibda x-xogħol biex parti oħra ta’ dak li kien Cafe Premier tinbidel f’berġa tas-saħħa u ċentru ta’ matul il-jum għall-anzjani kif spjega s-Sindku tal-Belt, il-Professur Alexei Dingli.

“Dawn iż-żewġ servizzi ħa jkunu fit-tieni fażi jiġifieri fil-parti l-ġdida tal-binja li għad irrid naħdmu fuqha u apparti minn hekk qed naħdmu wkoll biex ikun hawn maker space għat-tfal biex ikunu jistgħu jiġu hawnhekk u jitgħallmu, jiġifieri dawn is-servizzi kollha ħa jkunu servizzi ġodda għan-nies tal-belt u għalina u ta’ sodisfazzjon kbir ħafna,” qal is-Sindku.

Intqal li fit-tieni fażi tal-proġett se jiġi stallat lift li jagħti għall-Bibljoteka Nazzjonali li se ssir aċċessibli għal min għandu diffikultà ta’ mobiltà.

Il-Ministru Bonnici spjega li bħalissa fil-Belt Valletta għaddej xogħol ta’ restawr u tisbiħ fuq mill-inqas 14-il sit ieħor.

Aħbarijiet Oħra
Qorti

Eks-kuntistabbli tal-Pulizija, Jean Pierre Abdilla, li qed iservi sentenza ta’ 16-il sena ħabs fuq akkużi relatati mad-droga, ingħata €5,000 bħala kumpens morali mill-Qorti Ewropea tad-Drittijiet tal-Bniedem minħabba l-kundizzjonijiet xejn tajbin…

Saħħa

Il-President ta’ Malta Marie-Louise Coleiro Preca bdiet żjara fi sptarijiet f’Londra fejn pazjenti Maltin imorru għall-kura. B’kollox se żżur seba’ sptarijiet u tliet residenzi li fihom joqogħdu pazjenti u qrabathom….

Knisja Maltija

Pittura tal-Kardinal Malti Prospero Grech ingħaqdet mal-kollezzjoni tal-arti fil-Mużew tal-Katidral fl-Imdina. Il-pittura saret mill-artista Filippa Bianchi wara li studjat il-karattru tal-kardinal u semgħet mingħandu l-mod kif xtaq li tinħoloq ix-xbieha…

Unjoni Ewropea

Il-Kumitat tal-Parlament Ewropew dwar il-Kriminalità Finanzjajra u l-Evażjoni tat-Taxxa jrid li l-istati membri tal-Unjoni Ewropea jżarmaw il-programmi tagħhom li bihom jagħtu ċittadinanza jew residenza b’investiment. F’abbozz ta’ rapport imħejji mill-kumitat…

Aktar