Ambjent
Il-ġibjuni tal-WSC se jkomplu jintużaw biex jitwaħħlu l-pannelli tax-xemx

Aktar ġibjuni tal-Korporazzjoni għas-Servizzi tal-Ilma se jservu ta’ bażi għall-pannelli tax-xemx.

Il-Kap Eżekuttiv tal-Korporazzjoni għas-Servizzi tal-Ilma, Richard Bilocca, qal lil TVM li l-ġibjuni tal-korporazzjoni barra li ser iservu l-iskop tagħhom għall-ħażna tal-ilma ser jintużaw ukoll għall-ġenerazzjoni tal-enerġija nadifa permezz tal-panelli tax-xemx, kif diġà sar bil-ġibjun tal-Fiddien.

Is-Sur Bilocca, ħabbar li se toħroġ sejħa għall-offerti biex aktar pannelli tax-xemx jitwaħħlu fuq il-ġibjuni, li l-Korporazzjoni għandha madwar Malta u Għawdex.

Fuq il-ġibjun tal-Fiddien, fil-limiti tar-Rabat, diġà ġew stallati aktar minn tlett elef pannella tax-xemx, f’dak li hu meqjus bħala l-ewwel solar farm tal-komunità f’Malta.

“Naħseb hija waħda mill-ikbar Solar Farms li hawn Malta jiġifieri hu proġett massiv. Issa bħala Korporazzjoni ma waqafniex hemm u fil-ġimgħat li ġejjin ħa jkunu qed joħorġu t-tenders għal numru ta’ ġibjuni oħra li ħa nkunu qed nużaw għall-istess għan,” qal is-Sur Bilocca.

Il-Korporazzjoni għas-Servizzi tal-Ilma għandha ‘l fuq minn għoxrin ġibjun b’ħażna ta’ aktar minn 400 miljun litru ta’ ilma.

Is-Sur Bilocca spjega li l-Korporazzjoni għandha żewġ tipi ta’ ġibjuni. Dawk kbar, li jintużaw kemm għall-ħażna kif ukoll biex ġo fihom jitħallat l-ilma tar-Reverse Osmosis u l-ilma tal-pjan.

“Bħal-ġibjun tal-Qrendi, bħal-ġibjuni ta’ Ta’ Qali, għandna tliet ġibjuni hemmhekk kbar bħall-ġibjun tal-Fiddien, in-Naxxar, Ħal Luqa. Dawn huma ġibjuni kbar. Jiġifieri l-ġibjun ta’ Ħal Luqa pereżempju, fih kważi ħames tomniet, ta’ Ta’ Qali huwa ferm ikbar, tal-Fiddien jerġa’ ikbar, jiġifieri dawn hemmhekk aħna għandna qisu ‘cushion’ biex jekk ikollna interrupzzjoni, eżempju f’reverse osmosis waħda jew hekk, inkun nista’ nerfagħha bil-ġibjun.”

U oħrajn iżgħar bħal dawk fiż-Żurrieq u f’Wied il-Għajn, li jintużaw biex tissaħħaħ in-network fil-lokalità.

Is-Sur Bilocca qal li l-ġibjuni se jkunu parti kruċjali mill-proġett li qed taħdem fuq bħalissa l-Korporazzjoni għas-Servizzi tal-Ilma.

Qal li mill-mina, li qed titħaffer mill-ikbar impjant ta-Reverse Osmosis f’Pembroke għall-ġibjuni ta’ Ta’ Qali, se jgħaddi main ġdid tal-fibreglass. Spjega kif il-kwalità tal-ilma se tittejjeb għaliex l-ilma tal-pjan se jitħallat mal-ilma tar-Reverse Osmosis.

” Qabel dan aħna l-ilma tar-Reverse Osmosis minħabba li ngħadduh minn mejnijiet tal-ħadid u l-ilma jkun aggressiv irid nżiduh bil-ġebla. L-ilma tal-pjan diġà fih il-ġebla, l-ilma tal-pjan fih ħafna mluħa, issa billi ħa nħalltu dawn iż-żewġ tipi ta’ ilma bl-aħjar mod, ħa nkunu qed intejbu ċertu parametri li jaffettwaw it-togħma d-doppju.”

Is-Sur Bilocca qal li l-mod kif inhu ddisinsjat in-network, il-lokalitajiet kollha f’Malta se jkollhom l-istess kwalità ta’ ilma. Spjega li dan se jkun posibbli għaliex il-ġibjuni huma magħqudin wieħed mal-ieħor.

Aħbarijiet Oħra
Kronaka

Tifla ta’ 10 snin u mara ta’ 44 sena spiċċaw l-isptar wara ħabta fiż-Żejtun. L-inċident seħħ fi Triq tal-Barrani għall-ħabta tal-4pm bejn żewġ vetturi. Karozza minnhom kienet misjuqa minn mara…

Lokali

Fl-aħħar tletin sena, minn istitut f’Malta ta’ waħda mill-aġenziji speċjalizzati tan-Nazzjonijiet Magħquda, iggradwaw ‘il fuq minn 1,000 professjonist fil-qasam marittimu li huma mfittxija għal pariri legali mill-gvernijiet u l-industrija. It-tletin…

Lokali

Il-Federazzjoni Maltija għall-Produtturi tal-Akwakultura qalet li tinsab ippreokkupata bl-għadd ta’ irjus ta’ tonn, karkassi u tonn sħiħ fi stat qawwi ta’ dekompozizzjoni li qed jiġi rrapurtat dan l-aħħar. Fi stqarrija,…

Droga

Maqbud u mkisser bil-vizzju tad-droga fi skiet ta’ daru anke ‘l bogħod minn għajnejn familtu, illum li temm il-kors tal-Caritas b’suċċess għat-tieni darba, Alfred (isem fittizju) jgħid li l-akbar rimors li…

Aktar