Turiżmu
Il-ġimgħa ta’ Santa Marija – min jixxala u min jaħdem

L-abbundanza ta’ bajjiet fil-gżejjer Maltin u Għawdxin qed ikunu l-għażla ppreferuta għal ħafna li jgawdu il-vaganzi tagħhom f’Malta. Ironikament, dan l-istaġun huwa wkoll iż-żmien li matulu il-ħaddiema tat-turiżmu u ospitalità jkunu qed jaħdmu aktar biex ilaħħqu mad-domanda tal-Maltin u t-turisti.

Eluf ta’ Maltin u turisti qed igawdu il-vaganzi tagħhom f’dawn iż-żminijiet … b’diversi fabbriki u negozji jagħlqu l-bibien tagħhom għas-shutdown tradizzjonali t’Awwissu.

Għal dawk li jinsabu Malta, is-Sajf jirrappreżenta xalata ta’ alternattivi li jvarjaw għall-gosti ta’ kulħadd.

Min jippreferi l-kumdità ta’ xi pixxina, oħrajn jerħula lejn il-bajjiet Maltin.

TVM żar il-bajja ta’ San Tumas fin-nofsinhar ta’ Malta fejn ma kienx hemm fejn toqgħod labra …u staqsejna lil dawk li ltqajna magħhom kif jirrillassaw waqt il-btajjel tagħhom.

Ironikament, l-istaġun tas-sajf jirrappreżenta wkoll maratona ta’ xogħol bla waqfien għal dawk li jaħdmu fl-industrija tal-ospitalità bir-ristoranti, in-negozji u l-lukandi mimlija sa ruħ ommhom.

Clive Cauchi għandu gabbana f’Tas-Sliema. Jistqarr li ilu 35 sena ma jmur il-baħar u jammetti li l-familja tiegħu jkollha tagħmel diversi sagrifiċċji minħabba n-natura tax-xogħol tiegħu.

“It-tfal jiġu ħdejja u l-mara tiġi ħdejja u l-ħarġa tagħna hawn dejjem hawnhekk ili minn mindu kelli tmintax-il sena ma nieħu vaganza ili 35 sena dejjem hawn” qal Clive Cauchi.

James Galea, li jaħdem bħala manager f’lukanda jispjega li minkejja li l-impjegati jkunu imħabbta sew f’dan iż-żminijiet tas-sena, ix-xogħol qed jitqassam b’mod aktar bilanċjat tul is-sena. Qal li l-ingaġġ tal-impjegati barranin fl-industrija tat-turiżmu u l-ospitalità naqset xi ftit mill-piż li dari kien jintefa’ fuq il-ħaddiema Maltin.

“Il-ħaddiem barrani qiegħed jikkumpensa biex impjegati Maltin ikunu jistgħu jgawdu xi ftit mill-festi wkoll…ovvjament dawn huwa xogħolna u dan huwa l-passjoni u x-xogħol li nħobbu nagħmlu u l-familji tagħna jidrawna” qal James Galea.

It-tielet ġimgħa t’Awwissu mistennija tkun waħda mill-iktar impenjattivi għall-ħaddiema tat-turiżmu b’rekord assolut ta’ traffiku antiċipat fl-ajruport ta’ Malta nhar il-Ħadd dsatax t’Awwissu.

Aħbarijiet Oħra
Saħħa

Għal 15-il sena sħaħ, Eileen Mercieca ilha ġġorr is-salib ta’ marda rari li tikkaġunala infjamazzjonijiet madwar ġisimha kollu u xi drabi jħalluha bla saħħa mitluqa fis-sodda għal jiem sħaħ. Dil-marda…

Lokali

Botta u risposta bejn l-Oppożizzjoni u l-Gvern dwar il-femiċidju bil-Partit Nazzjonalista jgħid li l-Ministru Helena Dalli għandha terfa’ r-responsabbiltà tan-nuqqasijiet fil-qasam tal-vjolenza domestika, u l-Gvern jgħid li l-Oppożizzjoni hija rresponsabbli…

Lokali

Is-Segretarju Parlamentari għall-Ippjanar u s-Suq tal-Proprjetà, Chris Agius stqarr li l-Gvern u s-settur privat jistgħu jaħdmu id f’id biex flimkien jipprovdu housing affordabbli. Is-sur Aguis kien qed jitkellem f’konferenza tal-Malta…

Lokali

Kompliet is-saga bejn attivisti ta’ Occupy Justice u l-awtoritajiet dwar it-twaħħil ta’ strixxuni u xemgħat b’tifkira ta’ Daphne Caruana Galizia mal-monument tal-Assedju l-Kbir li wara l-festa nazzjonali ta’ Jum il-Vittorja…

Aktar