Barranin
Il-Gvern Awstraljan iwissi liċ-ċittadini tiegħu li jinsabu f’Hong Kong

Il-Gvern Awstraljan issospenda l-ftehim ma’ Hong Kong fuq l-estradizzjoni, u appella liċ-ċittadini Awstraljani li jinsabu f’din il-belt biex jikkunsidraw jekk għandhomx jibqgħu hemm.

L-Awstralja qed tieħu dawn id-deċiżjonijiet fid-dawl ta’ liġijiet ġodda dwar is-sigurtà nazzjonali li daħħlet iċ-Ċina l-ġimgħa l-oħra, u li pajjiżi tal-punent jemmnu li huma intiżi biex iwaqqfu l-libertà tal-espressjoni u l-kritika kontra l-Gvern Ċiniż.

Fil-fatt pajjiżi bħal Kanada u r-Renju Unit ukoll issospendew il-ftehim fuq l-estradizzjoni li kellhom ma’ Hong Kong.

Il-Gvern Awstraljan ħabbar ukoll li qed jestendi l-visa b’ħames snin għal madwar 10,000 residenti ta’ Hong Kong li qed jistudjaw jew jaħdmu fl-Awstralja.

Fl-istess waqt il-Gvern wissa liċ-ċittadini tiegħu li jinsabu f’Hong Kong, u li jgħoddu mal-100,000, li jistgħu jiġu arrestati fuq akkużi vagi marbuta mas-sigurtà nazzjonali, jew li jispiċċaw jiksru l-liġi bla ma jafu.