Brexit
Il-Gvern b’miżuri biex f’każ ta’ Brexit bla ftehim il-mediċini ma jogħlewx

Malta bħal pajjiżi tal-Unjoni Ewropea qed tħejji għall-eventwalità li r-Renju Unit joħroġ mill-Unjoni Ewropea mingħajr ftehim bil-konsegwenzi kollha li dan iġib miegħu. F’konferenza tal-aħbarijiet f’Kastilja, il-Prim Ministru Joseph Muscat qal li l-kabinett fil-laqgħa tat-Tlieta ħa sensiela ta’ deċiżjonijiet waqt li identifika diversi oqsma li jolqtu 13-il Ministeru li jridu jħejju għal Brexit mingħajr ftehim. Il-Prim Ministru qal li Malta trid tibqa’ l-iktar pajjiż viċin ir-Renju Unit għaċ-ċittadini u għan-negozji anke wara l-Brexit u ħabbar arranġament speċjali għar-residenti Ingliżi f’Malta kif ukoll għat-turisti Ingliżi li jżuru Malta.

Ix-xennarji li jolqtu lil Malta jekk ir-Renju Unit joħroġ mill-Unjoni Ewropea mingħajr ftehim qed jiġi indirizzat b’diversi passi mill-Gvern. Il-Prim Ministru Joseph Muscat qal li l-awtoritajiet Maltin diġà ħadu sensiela ta’ miżuri biex jilqgħu għal Brexit mingħajr ftehim, fost għax-xiri ta’ mediċini biex jassiguraw li ma jiskarsawx u kemm jista’ jkun ma jgħolewx b’riżultat tal-Brexit. Dr Muscat qal li l-kabinett identifika 82 liġi li jkollhom jiġu emendati minħabba l-Brexit.

Il-Prim Ministru ta assigurazzjoni lil madwar 13,000 ċittadin Ingliż li jgħix f’Malta li qal li jkollhom status speċjali ta’ residenza li jiġġedded kull għaxar snin mingħajr ebda ħlas. Ħabbar il-ħsieb ukoll li fl-ajruport ikun hemm linja preferuta apposta biex jgħaddu ċittadini li jkollhom passaport Ingliż li tkun ukoll għal ċittadini tal-pajjiżi msieħba fiż-żona ekonomika Ewropea. Il-Gvern qed jipproponi wkoll li ċ-ċittadini Ingliżi li jgħixu f’Malta jibqa’ jkollhom d-dritt jivvutaw fl-elezzjoni għall-Kunsilli Lokali.

Dr Muscat stqarr li bi swied il-qalb il-Gvern jinnota li r-Renju Unit jista’ joħroġ mill-Unjoni Ewropea mingħajr ftehim. Qal li l-gvernijiet Ewropej qed iħejju għal din l-eventwalità fuq bażi nazzjonali waqt li l-Kummissjoni Ewropea trid tieħu ħsieb oqsma li fuqhom għandha l-kompitenzi. Il-Prim Ministru qal li hemm qbil mal-Gvern Ingliż li l-ftehim bilaterali dwar is-saħħa jibqa’ fis-seħħ inkluż dwar it-taħriġ tat-tobba u r-rikonixximent tal-kwalifiki tat-tobba. Dwar il-kummerċ qal li fil-każ li jibqa’ ma jkunx hemm ftehim, japplikaw ir-regoli tal-Organizzazzjoni Dinja tal-Kummerċ, il-WTO.

Il-Prim Ministru qal li d-Dwana għamlet l-arranġament għax-xennarju ta’ Brexit mingħajr ftehim iżda spjega li dan ser ikun ifisser żieda fil-burokrazija bid-dwana ikollha tipproċessa mas-7,000 dokument fil-ġimgħa għal merkanzija mir-Renju Unit. Qal li l-Gvern diġà ħabbar għajnuna għal kumpaniji Maltin li jinnegozjaw mir-Renju Unit u lest jagħti wkoll għajnuna lis-settur turistiku jekk dan jintlaqat minħabba fost oħrajn il-valur tal-Isterlina li jista’ jagħmel vaganza f’Malta aktar għolja.

Lil hinn mill-konsegwenzi negattivi tal-Brexit, il-Prim Ministru stqarr li huwa sodisfazzjon bin-numru ta’ kumpaniji li rreġistraw f’Malta mal-MFSA anke jekk dawn mhux jagħtu pubbliċità li għażlu lil Malta. Qal li t-task force dwar il-Brexit immirat li tħajjar investituri jkollhom bi lokazzjoni. Dr Muscat qal li t-task force kellha suċċess speċjalment ma’ kumpaniji Indjani, Amerikani u anke Ġappuniż. Il-Prim Ministru qal li fis-settur tal-egaming, Malta attirat l-ikbar kumpaniji fis-suq.

Ara wkoll:

Il-PM jiżvela t-tħejjijiet ta’ Malta f’każ ta’ Brexit bla ftehim

Aħbarijiet Oħra
Politika

Il-mexxej tal-Partit Demokratiku, Dr. Godfrey Farrugia, iddeċieda li joħroġ għall-elezzjoni tal-Parlament Ewropew. Meta ħabbar it-tliet kandidati tiegħu, il-PD kien indika li dawn in-nomini kienu finali, u li ma kinux se…

Kronaka

Qed issir tfittxija għal Mary Muscat li ġiet irrappurtata nieqsa fit-18 t’April 2019 għall-ħabta tat-15:00. Hija dehret l-aħħar nhar is-17 t’April 2019 għall-ħabta tal-23:35. Mary Muscat tbati bid-Dimenzja. Kull min…

Reliġjon

Tmien adulti minn seba’ pajjiżi differenti se jirċievu s-sagramenti tal-bidu tal-ħajja nisranija mill-Arċisqof, Monsinjur Charles J. Scicluna, illejla, waqt iċ-ċerimonja tal-Vġili tal-Għid fil-Konkatidral ta’ San Ġwann. Iċ-ċelebrazzjoni tal-Vġili tal-Għid se…

Kronaka

Karozza tat-tip Mitsubishi Shogun qalbet mutur tal-pulizija fil-Ħamrun. Il-Pulizija qalet li dan ġara wara li l-pulizija waqqfu ġuvni ta’ 24 sena minn Ħal Tarxien iżda dan ma koperax, irreżista u…

Aktar