Parlament
Il-Gvern u l-Oppożizzjoni jiddiskutu l-konklużjonijiet tar-rapport Greco

F’dibattitu fil-Parlament, il-Gvern u l-Oppożizzjoni taw il-verzjonijiet tagħhom b’nuqqas ta’ qbil bejniethom dwar il-konklużjonijiet tar-rapport Greco tal-Kunsill tal-Ewropa. Fil-ħames rapport dwar Malta li jsir kull sentejn, il-kumitat Greco kien kritiku għal diversi aspetti fil-ġlieda tal-istituzzjonijiet Maltin kontra l-korruzzjoni. Fid-dibattitu ħadu sehem il-Prim Ministru u l-Kap tal-Oppożizzjoni u diversi membri miż-żewġ naħat tal-kamra.

Il-Prim Ministru Joseph Muscat qal li l-Gvern laqa’ b’mod kostruttiv ir-rapport Greco tal-Kunsill tal-Ewropa. Fil-ftuħ tad-dibattitu fil-Parlament dwar dar-rapport, Dr Muscat qal li ħafna minnu huwa bbażat aktar fuq dak li jintqal fuq il-midja u mis-soċjetà ċivili li x-xejra tal-organizzazzjoni internazzjonali hija li jagħtu aktar importanza lis-soċjetà ċivili milli dak li jgħidu l-Gvernijiet. Dr Muscat qal li l-Gvern ser jieħu l-punti tajbin ta’ dan ir-rapport u ser janalizzah sew.

Il-Prim Ministru qal li min jiżra r-riħ jaħsad it-tempempesta. Qal li ħafna mill-osservazzjonijiet tar-rapport huma riżultat ta’ kif parti mill-Oppożizzjoni aġixxiet fl-aħħar snin, li tat l-impressjoni lid-demokrazija f’Malta mhux qed taħdem. Qal li dan mhuwiex minnu u prova ta’ dan hija li l-Qorti ddeċidiet li tagħti żewġ siġġijiet lill-Oppożizzjoni f’deċiżjoni li Dr Muscat qal jista’ jkollha konsegwenzi serji għall-istabbiltà tal-pajjiż għax tista’ toħloq konfużjoni politika aktar ‘il quddiem. Qal li għalkemm għandu riżervi fuq din is-sentenza, il-Gvern aċċettaha.

Il-Prim Ministru qal li l-Gvern għamel ħafna biex l-istituzzjonijiet jaqdu dmirhom tajjeb u għamel diversi liġijiet li saħħew l-istituzzjonijiet.

Fl-intervent tiegħu, il-Kap tal-Partit Demokratiku Godfrey Farrugia qal lir-rapport Greco jgħid li Malta huwa stat korrott. Qal li r-rapport jikkonferma li l-Gvern żelaq fin-nixef fil-governanza, fit-trasparenza u fil-kontabilità. Qal li l-Gvern qed jabbuża mil-liġijiet u immina l-kredibilità tal-pajjiż.

Il-Kap tal-Oppożizzjoni Adrian Delia ressaq mozzjoni għat-twaqqief ta’ kumitat parlamentari biex jifli d-diversi rapporti dwar Malta u jirrakkomanda proposti ħalli jiġu implimentati.

Dr Delia sostna li mhux tort tal-Partit Nazzjonalista li saru dawn ir-rapporti. Il-kelliem qal li l-Partit Nazzjonalista huwa maqgħud kontra l-korruzzjoni. Huwa qal li l-pajjiż wasal fejn wasal minħabba li l-Ministru Konrad Mizzi ssemma’ fil-Panama Papers u baqa’ fil-kabinett. Dr Delia qal li r-rapport GRECO jikkonkludi dak li qed tħoss is-soċjetà ċivili għax hija l-unika li ma għandhiex sarima ma’ ħalqha.

Dr Delia qal li Malta waqgħet fil-51 post fl-indiċi dwar il-perċezzjoni tal-korruzzjoni ta’ transparency international. Huwa qal li r-rapport Greco jitkellem dwar il-kollass tal-istituzzjonijiet tal-pajjiż, dwar il-partiġġjanizmu u nies qrib il-Prim Ministru. Dr Delia qal li l-Gvern ħataf l-istituzzjonijiet bil-konsegwenza li l-pajjiż jinsab mifni bil-korruzzjoni li qal qed tiswa’ lil pajjiż €725 miljun fis-sena.

Aħbarijiet Oħra
Lokali

L-għodwa għal John Cortis minn Ħal Qormi ma kinitx bħas-soltu. Ma’ TVM spjega li dalgħodu xħin qam xamm riħa ta’ ħruq u sema’ xi tfaqqigħ bħal bombi tal-festa. Huwa ħaseb…

Qorti

Kaled Muktahar Ben Gamhur ġie kkundannat 18-il xahar priġunerija. Huwa ammetta li seraq €118 u mobile minn karozza fil-15 ta’ Ġunju li għadda. L-akkużat kkommetta dan ir-reat ix-xahar li għadda…

Kronaka

Nirien żgħar ħakmu f’restaurant fil-Gżira. Il-każ seħħ għall-ħabta tas-7.30am fi Triq ix-Xatt. In-nirien li żviluppaw f’restaurant ġew ikkontrollati mill-membri tal-Protezzjoni Ċivili. Dak il-ħin ma kien hemm ħadd ġewwa. Kelliema għall-Pulizija…

Saħħa

Is-Segretarju Parlamentari għall-Anzjanità Attiva, Anthony Agius Decelis ħabbar proġett pilota li se jibda mill-ġimgħa d-dieħla fejn anzjani li ma jistgħux joħorġu mid-dar, mill-Mosta u Birkirkara se jkunu jistgħu jitolbu biex…

Aktar