Politika
Il-Kamra tal-Kummerċ tippreżenta lill-Prim Ministru dokument b’aktar minn 60 proposta

Delegazzjoni tal-Kamra tal-Kummerċ ippreżentat lill-Prim Ministru Robert Abela dokument b’aktar minn 60 proposta għat-tisħiħ tal-governanza u s-saltna tad-dritt. F’laqgħa f’Kastilja l-President tal-Kamra tal-Kummerċ, David Xuereb stqarr li l-kamra hija sodisfatta bid-deċiżjonijiet meħuda mill-Prim Ministru fl-ewwel jiem fil-kariga tiegħu.

Il-Perit Xuereb qal li l-manifest bit-tema n-Negozju Etiku jsejjaħ għal bidla qed jipproponi riformi f’bosta oqsma tal-amminsitrazzjoni pubblika mill-ħatriet fil-ġudikatura sal-finanzjament tal-partiti biex Malta tirkupra r-reputazzjoni u l-integrità tagħha li qal ittapnet fl-aħħar xhur. Qal li l-komunità internazzjonali qiegħda tħares lejn Malta biex tara jekk il-bidla fit-tmexxija tal-pajjiż hiex ser iġġib bidla konkreta. Qal li l-ewwel deċiżjoni qed tagħti sinjal tajjeb.

Huwa qal li biex ir-riformi jħallu r-riżultati mixtieqa jridu jsaħħu primarjament l-kontabiltà, it-trasparenza u s-saltna tad-dritt. Fost numru ta’ proposti d-dokument jissuġerixxi li l-Prim Ministru jindirizza l-allegazzjonijiet dwar il-kuntratti tal-Gvern fl-aħħar sitt xhur, is-sospensjoni temporanju tal-iskema ċittadinanza b’investiment u evalwazzjoni tal-mod li bih jinħatru l-persuni f’karigi ta’ importanza nazzjonali.