Budget
“Il-Kap tal-Oppożizzjoni wieġeb għalkollox ħlief għall-budget” – PM

Il-Prim Ministru Joseph Muscat qal li fir-reazzjoni tiegħu għall-budget, il-Kap tal-Oppożizzjoni Adrian Delia wieġeb għalkollox ħlief għall-budget. F’kummenti lill-ġurnalisti wara d-diskors, qal li f’sagħtejn sħaħ il-kap tal-Oppożizzjoni kien negattiv.

“Injora għalkollox il-budget li ġie ppreżentat u agħar minnhekk kellu diskors f’waqtiet minnhom b’lemħiet xenofobi fejn ipprova jagħti l-impressjoni u jipprova jġelled lill-Maltin mal-barranin. Dak hu diskors populista li faċli tagħmlu imma fil-verità tkun qed tiżra żerrieġħa verament kera tal-mibgħeda għas-snin li ġejjin.”

Il-Prim Ministru qal li jiddispjaċih li l-Kap tal-Oppożizjzoni ma sabx ħin biex jikkumenta dwar l-akbar żieda f’erbgħin sena li qatt ingħataw il-pensjonanti, dik ta’ seba’ ewro fil-ġimgħa, ma kkummentax li l-gvern reġa’ żied il-leave tal-ħaddiema u lanqas dwar il-miżuri ambjentali li ħa l-gvern fosthom il-projbizzjoni tal-plastik u l-qalba għal karozzi li jniġġzu inqas.

Mistoqsi dwar l-irvellijiet mill-immigranti fiċ-ċentru miftuħ ta’ Ħal Far, il-Prim Ministru qal li l-punt kruċjali għalih hu li kulħadd irid josserva l-liġijiet. Qal li f’sitwazzjonijiet bħal dawn ikun hemm min jipprova jiżra l-mibgħeda ta’ aħna kontra huma, iżda qal li llum hu mhux se jibdel il-pożizzjoni tiegħu favur l-integrazzjoni għax is-sentiment mhux l-istess fost il-poplu.