Infrastruttura
Il-katusi tal-ilma li jitqabbdu mad-drenaġġ qed joħolqu bosta problemi

Waħda mill-kawżi ewlenin ta’ ħruġ ta’ drenaġġ fit-triq u fil-baħar ġejja minn katusi tal-ilma tax-xita li qed jitqabbdu direttament mas-sistema tad-drenaġġ. Jirriżulta li ħafna ma jafux li dan hu l-każ fil-proprjetà tagħhom.

Il-Kap Eżekuttiv tal-Korporazzjoni għas-Servizzi tal-Ilma, Richard Bilocca, qal lil TVM li din is-sistema, li hija illegali u li qed tintuża aktar ta’ spiss, qed tkun il-kaġun ta’ bosta problemi fis-sistemi tad-drenaġġ.

Il-Kap Eżekuttiv qal li ħafna mill-iżbroffi tad-drenaġġ qed jiġu kkawżati minħabba li f’ħafna residenzi l-ilma tax-xita minn fuq il-bjut qed jispiċċa fis-sistema tad-drenaġġ.

“In-network ta’ drenaġġ huwa ddisinjat fuq il-kwantitajiet tad-drenaġġ. Eżempju meta tagħmel ħafna xita d-drenaġġ ifur. Ħadd ma jieħu pjaċir li d-drenaġġ ifur fit-triq, imma d-drenaġġ qed ifur fit-triq għax għandna numru estensiv ta’ djar li sfortunatament għandhom l-ilma tal-bejt imqabbad mas-sistema tad-drenaġġ, li hija xi ħaġa li mhux suppost issir u ma tistax issir.”

Is-sur Bilocca qal li l-ħaddiema tal-korporazzjoni qed jiltaqgħu ma’ każi wkoll fejn meta jintlew il-bjar, l-ilma jgħaddi minn katusa u jmur fis-sistema tad-drenaġġ minflok fit-triq. “Dawn in-nies qed jidħlu f’riskju li jkun hemm ‘back flow’ ta’ drenaġġ għal ġol-bjar tagħhom, jiġifieri dawn f’temp ta’ ftit minuti l-bir inti fejn mingħalik li inti mtela’ bl-ilma tax-xita, taf ikun imtlielek bid-drenaġġ.”

Is-Sur Bilocca argumenta li dawn l-abbużi qed joħolqu problema kbira, anke fil-pumping stations tal-korporazzjoni, li ma jlaħħqux bil-konsegwenza li d-drenaġġ jiżbroffa fil-baħar jew fit-toroq.

Żied li f’ċertu każi ssir ħsara kbira fl-istruttura tat-triq. Hu qal li l-Korporazzjoni għas-Servizzi tal-Ilma tirrapporta każi bħal dawn lill-awtoritajiet, u f’xi wħud ħadet passi immedjati minħabba l-problemi kbar li jkunu qed jikkawżaw.

Aħbarijiet Oħra
Qorti

Immigrant żagħżugħ ta’ 16-il sena li gidem uffiċjal tad-detenzjoni hekk kif prova jaħrab miċ-ċentru ta’ detenzjoni f’Ħal Safi jumejn ilu baqa’ miżmum arrestat. Iż-żagħżugħ irnexxielu jiddendel mal-fence taċ-ċentru tad-detenzjoni u…

Kostruzzjoni

Il-President tal-għaqda tal-iżvilupatturi Sandro Chetcuti ikkundana mingħajr tlaqliq ir-rimi ta’ skart tal-kostruzzjoni f’ambjent naturali u fil-wied tal-Imġarr. Huwa qal li l-MDA għandha ħjiel ta’ minn rema l-iskart tal-kostruzzjoni f’wied fl-Imġarr…

Qorti

Ragel ta’ 58 sena ġie akkużat li ta b’mus lil kuġinuh wara argument fuq kera. L-inċident seħħ jumejn ilu tard waranofsinhar fi Sqaq Warda, f’Ħal Għargħur. Il-vittma, li għandu 74…

Kronaka

Dalgħodu tilfet ħajjitha l-anzjana li ttajret 4 xhur ilu f’San Ġwann. Hija mietet fl-isptar Mater Dei fejn kienet ilha minn dik inhar tal-inċident f’koma kawża tal-ġrieħi serji li ġarrbet f’rasha….

Aktar