Parlament
Il-Kummissarju għall-Istandards jgħid li qed jinvestiga tliet każi

Fl-ewwel laqgħa tal-Kumitat Parlamentari għall-Istandards fil-Ħajja Pubblika, il-Kummissarju tal-Istandards, l-Avukat George Hyzler, ikkonferma li qed jinvestiga tliet każi. Dr Hyzler qal li l-każi li jinvestiga mhux ser jagħmilhom pubbliċi.

Żied jgħid ukoll li ġie mistoqsi mill-midja jekk hux qed jinvestiga lill-Kap tal-Oppożizzjoni Adrian Delia fuq l-allegazzjoni ta’ vjolenza domestika. Spjega li bil-liġi huwa ma jistax jinvestiga każi li jkunu fil-Qorti.

Fl-istess laqgħa l-Ispeaker Anġlu Farrugia li jippresiedi l-kumitat wera diżappunt li l-Kummissjoni Venezja tal-Kunsill tal-Ewropa għamlet proposti fuq il-Parlament mingħajr ma indenjat ruħha titkellem miegħu u mal-Parlament.

Kien id-Deputat Nazzjonalista Simon Busuttil li staqsa lil Dr Hyzler huwiex ser jirrapporta dwar il-proposti tal-Kummissjoni Venezja, li fost oħrajn qalet li l-Parlament huwa dgħajjef biex jikkontrolla lill-Gvern minħabba li backbenchers tal-Gvern ngħataw ħatriet f’entitajiet tal-Gvern, kif ukoll id-deputati tal-Parlament huma part-timers.

Dr Hyzler qal illi huwa ma jidħolx fid-dibattitu dwar deputati full-time u part-time jekk mhux fuq kwistjonijiet ta’ kunflitt ta’ interess. Huwa qal li se jistudja l-kwistjoni ta’ deputati li jridu jagħmlu skrutinju fuq il-Gvern waqt li jokkupaw kariga fi ħdan l-istess gvern. Qal li jaħseb li dan jista’ jkun kontradittorju.

L-Ispeaker Anġlu Farrugia lmenta li d-delegazzjoni tal-Kummissjoni Venezja ma ltaqgħetx miegħu biex jispjega x’sar fl-aħħar ħames snin għat-tisħiħ mill-Parlament biex tiżdied it-trasparenza u l-kontabbiltà. Dr Farrugia qal illi l-Kummissjoni Venezja waslet għal konklużjonijiet li sejħilhom strambi dwar l-indipendenza tal-Parlament, u fakkar li kien hemm żmien meta l-backbenchers tal-Gvern inħatru assistenti Parlamentari mal-Ministri.

Dwar l-ilmenti li qed jinvestiga, il-Kummissarju Hyzler qal li qed jinvestiga tliet ilmenti waqt li rrifjuta lment li prima facie ma kienx jaqa’ taħt il-liġi tal-istandards. Semma’ wkoll li ġie mistoqsi minn ġurnalista jekk kienx se jinvestiga l-allegazzjoni ta’ vjolenza domestika mill-Kap tal-Oppożizzjoni Adrian Delia. Il-Kummissarju Hyzler qal li huwa prekluż milli jagħmel dan minħabba li l-allegazzjoni hija suġġett ta’ kawża fil-Qorti.

Huwa qal li huwa ma jitkellmx mal-medja dwar każijiet investigati iżda jirraporta lill-Kumitat Parlamentari dwar ksur ta’ etika. Każijiet ta’ natura kriminali u korruzzjoni jgħaddihom lill-awtoritajiet kompetenti biex jinvestigaw huma. Dr Hyzler ħabbar li l-Kummissarju għall-Istandards fil-ħajja pubblika tal-Parlament Ingliż Catherine Stone għandha tiġi Malta f’Mejju li ġej u tindirizza d-deputati Maltin dwar il-ħidma tagħha.

Intant ir-rapport mill-Kummissjoni Venezja tqajjem ukoll fil-Parlament mid-deputati Simon Busuttil u Edward Zammit Lewis. Il-Ministru għall-Ġustizzja Owen Bonnici qal illi b’mod ġenerali l-Gvern jaqbel mal-proposti li saru mill-Kummissjoni għat-tisħiħ tal-istituzzjonijiet tal-pajjiż.

Huwa qal li ż-żewġ naħat tal-kamra qed jiltaqgħu taħt it-tmexxija tal-President Marie Louise Coleiro għar-riforma tal-kostituzzjoni u sejjaħ it-taħditiet s’issa bħala pożittivi ħafna. Mistoqsi jekk il-Gvern hux ser ikompli jaħtar ġudikanti qabel iwettaq il-proposti tal-kummissjoni, il-Ministru Bonnici qal li l-vakanzi fil-ġudikatura se jimtlew biex il-ħidma tal-Qorti ma taqax lura.

Aħbarijiet Oħra
Politika

Għadd ta’ bdiewa dalgħodu mblukkaw id-daħla għall-faċilitajiet tal-Wasteserv fil-Magħtab bi protesta għall-pjani biex tespropja 250,000 metru kwadru ta’ raba’ għat-tkabbir tal-faċilitajiet tagħha. Il-bdiewa pparkjaw l-inġenji tagħhom qrib ir-roundabout bejn Triq…

Avjazzjoni

Dilettanti tal-avjazzjoni il-Ġimgħa filgħodu kellhom x’jaraw hekk kif fl-Ajruport Internazzjonali ta’ Malta niżlu grupp ajruplani Saudi Hawks, tat-tip BAE Hawk. Dawn jagħmlu parti mit-tim akrobatiku tar-Royal Saudi Air Force. Huma…

Politika

Ippubblikat dokument għall-konsultazzjoni pubblika bil-proposti tal-Kummissarju għall-Istandards fil-Ħajja Pubblika, dwar kif għandu jiġi regolat il-lobbying minn individwi jew assoċjazzjonijiet li jippruvaw jinfluwenzaw id-deċiżjonijiet tal-gvern biex jieħdu vantaġġ privat. Il-Kummissarju Geoge…

Aktar