Saħħa
Il-Kummissarju tas-Saħħa Mentali jwissi li d-dipressjoni ma titfejjaqx fi ftit minuti

Reklam minn setta reliġjuża li jistgħu jfejqu d-dipressjoni fi tliet minuti biss qajjem diskussjoni. Fl-isfond ta’ diversi kampanji biex jitqajjem għarfien dwar id-dipressjoni, dan ir-reklam weġġa’ lil bosta.

Dan wassal biex l-Uffiċċju tal-Kummissarju għas-Saħħa Mentali joħroġ stqarrija li fiha qal li d-dipressjoni mhix marda li tista’ tikkuraha fi ftit minuti. Huwa ta parir biex wieħed jfittex pariri u servizzi mingħand entitajiet li huma reġistrati u rikonoxxuti fil-qasam tal-kura tas-saħħa mentali u mingħand professjonisti li huma liċenzjati u regolati biex joffru dawn is-servizzi. Servizzi minn entitajiet jew individwi li mhux liċenzjati jew regolati biex jagħmlu dan ix-xogħol jistgħu jkunu ta’ dannu aktar milli ta’ ġid għal persuni vulnerabbli speċjalment jekk is-servizzi jiġu ppreżentati bħala ‘kura ta’ malajr u b’xejn’.

Skont l-Organizzazjoni Dinjija tas-Saħħa hemm diversi forom ta’ dipressjoni iżda karaterristiċi komuni huma dwejjaq, li wieħed jitlef interess f’affarijiet li normalment kien iħobb, problemi bl-irqad, għejja, problemi biex wieħed jikkonċentra u bidla fl-aptit għall-ikel.

Id-dipressjoni tista’ tkun ukoll minħabba ċirkostanzi li wieħed ikun għaddej jew għadda minnhom bħal problemi soċjali, problemi tas-saħħa u problemi ta’ xogħol. Sfortunament minħabba li l-kundizzjoni ma tistax titkejjel b’mod li jidher, pereżempju permezz ta’ testijiet tad-demm jew kejl ieħor, jista’ jkun li l-persuna jew dawk ta’ madwarha ma jindunawx li qegħdin f’sitwazzjoni li tirrikjedi l-għajnuna. Oħrajn jindunaw li għandhom bżonn l-għajnuna u ma jafux fejn se jsibuha u għaldaqstant huma ħafna li jfittxu għajnuna permezz tal-internet u l-midja  soċjali. Waqt li xi informazzjoni tista’ tkun utli biex wieħed jagħmel l-ewwel passi neċessarji biex ifittex l-għajnuna mhux dak kollu li ssib fuq il-media soċjali huwa veru jew xjentifikament korrett.

Aħbarijiet Oħra
Politika

Għadd ta’ bdiewa dalgħodu mblukkaw id-daħla għall-faċilitajiet tal-Wasteserv fil-Magħtab bi protesta għall-pjani biex tespropja 250,000 metru kwadru ta’ raba’ għat-tkabbir tal-faċilitajiet tagħha. Il-bdiewa pparkjaw l-inġenji tagħhom qrib ir-roundabout bejn Triq…

Avjazzjoni

Dilettanti tal-avjazzjoni il-Ġimgħa filgħodu kellhom x’jaraw hekk kif fl-Ajruport Internazzjonali ta’ Malta niżlu grupp ajruplani Saudi Hawks, tat-tip BAE Hawk. Dawn jagħmlu parti mit-tim akrobatiku tar-Royal Saudi Air Force. Huma…

Politika

Ippubblikat dokument għall-konsultazzjoni pubblika bil-proposti tal-Kummissarju għall-Istandards fil-Ħajja Pubblika, dwar kif għandu jiġi regolat il-lobbying minn individwi jew assoċjazzjonijiet li jippruvaw jinfluwenzaw id-deċiżjonijiet tal-gvern biex jieħdu vantaġġ privat. Il-Kummissarju Geoge…

Aktar