Il-Kummissjoni Ewropea approvat skema ta’ għajnuna finanzjarja mill-gvern Malti, fil-livell ta’ €11.5 miljun, f’appoġġ għall investimenti fil-produzzjoni ta’ prodotti rilevanti għall-pandemija bħal tilqim, mediċini, tagħmir għall-isptarijiet bħal ventilators u tagħmir ta’ protezzjoni personali.
Il-Kummissjoni qalet li b’dawn il-fondi se jingħataw għotjiet diretti u inċentivi ta’ taxxa. L-iskema hi miftuħa għall-intrapriżi kollha li jistgħu jimmanifatturaw dawn il-prodotti.
“Bl-iskemi li saru ġew salvati aktar minn 90,000 impjieg”
Intant, il-Prim Ministru Robert Abela, qal li f’xahar il-ħaddiema tal-Malta Enterprise għenu biex ingħataw aktar minn €50 miljun f’għajnuna lill-ħaddiema.
Waqt żjara lill-ħaddiema tal-Malta Enterprise fi Gwardamangia, il-Prim Ministru rringrazzjahom għall-irwol tagħhom biex tfasslu skemi li permezz tagħhom ġew salvati aktar minn 90,000 impjieg.
Fi stqarrija tal-gvern intqal li matul iż-żjara, ġie spjegat kif il-ħaddiema addattaw għal dawn iċ-ċirkostanzi straordinarji biex jippoċessaw eluf ta’ applikazzjonijiet li ġew sottomessi lill-aġenzija. Fl-istess waqt, it-tmexxija tal-Malta Enterprise baqgħet iffukata biex tkompli tattira iżjed investiment barrani lejn Malta.
Il-Prim Ministru assigura li l-Gvern se jkompli jkun ta’ appoġġ għall-ħaddiema u l-intrapriżi biex f’qasir żmien jerġa’ jkollhom sehem ewlieni fit-tkabbir tal-ekonomija.
Il-Ministru Schembri qal li f’dawn l-aħħar xahrejn il-ħaddiema tal-Malta Enterprise wieġbu madwar 60,000 talba ta’ għajnuna.
Prime Minister Robert Abela visits Malta Enterprise
Prime Minister Robert Abela visits Malta Enterprise
Prime Minister Robert Abela visits Malta Enterprise