Lokali
Il-Kuntistabbli Schembri tneħħa minn fuq il-magni – l-elmu salvalu ħajtu

Rapport fl-aħħar ħinijiet mill-isptar Mater Dei, jgħidu li l-Kuntistabbli Simon Schembri qed jirreaġixxi tajjeb għall-kura u anke tneħħa minn fuq il-magni. Huwa għadu fit-taqsima tal-kura intensiva f’qagħda stabbli wara li ġie operat għal ġrieħi gravi li sofra b’mod partikulari f’idu. Sorsi li tkellmu ma’ TVM qalu li l-elmu salvalu ħajtu. Sadanittant, il-każ tiegħu waqt li xxukja lill-pajjiż kollu, it-trawmatizza lill-korp tal-Pulizija speċjalment lill-kollegi tiegħu fis-sezzjoni tat-traffiku.

L-għada tal-inċident li fih il-Kuntistabbli Simon Schembri spiċċa mkaxkar għal diversi metri taħt karozza misjuqa miż-żagħżugħ Liam Debono, l-atmosfera fis-sezzjoni tal-pulizija tat-traffiku kienet waħda ta’ dieqa kbira. L-Ispettur Pierguido Saliba, li jmexxi din it-taqsima, ma’ TVM qal li ma kienx faċli li fl-ewwel sigħat wara dan l-inċident, il-membri ta’ din it-taqsima jaħdmu b’mod normali. Qal li minkejja dan, il-Pulizija, mhux biss tiegħu, iżda wkol tal-korp kollu, se jibqgħu leali lejn il-ġurament li ħadu.

Spettur tat-Taqsima tat-Traffiku, Pierguido Saliba qal li “aħna minbarra li pulizija aħna umani, allura kulħadd iħossha, kollha familja waħda, għalina qisu ħuna, ippruvaw joqtlu lil wieħed minn ħuna. Imma issa fl-aħħar mill-aħħar aħna għandna x-xogħol x’nagħmlu u ħadna ġurament għas-soċjetà li nipproteġuha u dmirna ġejna għax-xogħol.”

L-Ispettur Saliba appella lis-sewwieqa biex ikollhom aktar rispett lejn il-Pulizija, li dak li qed jagħmlu huwa biss xogħolhom.

L-Ispettur qal li “jista’ jkun li bniedem jiżbalja u ma jkun ġara xejn u aħna bħala pulizija apparti li nipproteġu parti minn xogħolna huwa li ninfurzaw il-liġijiet”.

L-Ispettur Edward Zammit, li jmexxi l-Counselling Unit tal-Korp, qal lil TVM li l-unit, flimkien mal-Kappillan tal-Korp, kif ukoll l-Victim Support Unit tal-Korp tal-Pulizija, sa mill-ewwel mumenti ta’ wara l-każ, tkellmu mal-pulizija tat-taqsima tat-traffiku sabiex jingħataw l-għajnuna kollha li hemm bżonn.

L-Ispettur Zammit qal li “ħafna mid-drabi l-pulizija kemm bl-esperjenza tagħhom u bit-taħriġ li jingħataw ikunu kapaċi u jegħlbu l-isfidi minħabba emozzjonijiet tqal li jista’ jkollhom. Imma jiġu drabi oħra, fejn stress ikun tant qawwi, li hemm jidħol is-servizz professjonali li wieħed javviċina għal aktar għajnuna biex jgħelbu dawk il-mumenti diffiċli”.

Iż-żewġ assoċjazzjonijiet li jirrappreżentaw lill-pulizija qalu li s-Sibt illi ġej se jorganizzaw mixja ta’ solidarjetà.

F’messaġġ fuq il-profil tagħha ta’ facebook Leah Schembri, bint il-kuntistabbli ferut irringrazzjat lil kulħadd għas-solidarjetà li wrew mal-familja waqt li talbet biex issir ġustizzja. Qalet li missierha ilu fis-servizz 22 sena, u salva ħajjiet u ħareġ qalbu għax-xogħol biex jgħin lil min ġie fil-bżonn.

Aħbarijiet Oħra
Stejjer Umani

Koppja li ftit tax-xhur ilu adottat tifel mill-Indja esprimiet il-ferħ tagħha fuq is-siti soċjali, kif ukoll wasslet messaġġ biex it-tfal jiġu mgħallma iktar dwar id-diversita’, b’mod partikolari mill-ġenituri stess. Biex…

Kronaka

Viżibilment taħt xokk, Joseph Attard li lbieraħ kien fil-mira tal-ħalliel fil-ħanut tiegħu f’Ħaż-Żabbar, irrakkonta ma’ TVM kif hu, flimkien ma’ żewġt iħbieb tiegħu rreżistew il-ħalliel li anke spara b’arma tan-nar….

Kunsilli Lokali

Il-kunsilli ser ikollhom pubblikazzjoni maħsuba apposta biex tgħinhom jiksbu fondi addizzjonali minn programmi tal-Unjoni Ewropea. Dan tħabbar mis-Segretarju Parlamentari għall-Fondi Ewropej u DAaron Farrugia u s-Sur Parnis. Iż-żewġ Segretarji Parlamentari,…

Kronaka

Kuntistabbli tal-Pulizija stazzjonat fl-Iskwadra ta’ Kontra d-Droga llejla ngħata l-kura fl-isptar wara li sofra xi ġrieħi waqt il-qadi ta’ dmirijietu. Il-każ ħareġ fil-pubbliku permezz ta’ post fuq il-paġna ta’ facebook…

Aktar