Barranin
Il-Palestinjani jidfnu l-mejtin l-għada tal-iktar jum imdemmi fl-aħħar snin

Fil-Lvant Nofsani irritornat il-kalma relattiva iżda fuq livell diplomatiku l-eku tal-vjolenza tal-bieraħ għadu jidwi b’diskussjoni fil-Kunsill tas-Sigurtà tan-Nazzjonijiet Magħquda u bil-kundanna ġenerali ta’ Iżrael minn pajjiżi li normalment huma meqjusa bħala alleati tal-Istati Uniti u Iżrael.

Il-Gvern Malti wkoll wera dispjaċir għaż-żieda fil-vjolenza. Qal li d-dritt tal-espressjoni u ta’ protesti paċifiċi għandhom ikunu rispettati waqt li Iżrael għandu jirreaġixxi b’mod proporzjonat.

Il-Gvern wera tħassib li din iż-żieda fil-vjolenza thedded il-prospetti għal soluzzjoni fin-negozjati għal żewġ stati ta’ Iżrael u tal-Palestina.

L-għada tal-aktar jum imdemmi f’erba’ snin, fil-Medda ta’ Gaza llum il-Palestinjani bdew jidfnu lill-mejtin tagħhom, l-ewwel minn fost it-58 li lbieraħ inqatlu waqt li kienu qed jipprotestaw kontra l-ftuh tal-ambaxxata Amerikana f’Ġerusalemm. Il-Palestinjani nqatlu hekk kif truppi Iżraeljani fetħu n-nar fuqhom.

Il-funerali saru fl-istess jum li l-Palestinjani fakkru n-Nakba… it-tifkira qarsa ta’ meta sebgħin sena ilu mijiet ta’ eluf ta’ Palestinjani sfaw refuġjati hekk kif kellhom jaħarbu minn art twelidhom minħabba t-twaqqif ta’ Iżrael bħala stat.

Fuq livell diplomatiku iżda Iżrael kellu jħabbat wiċċu ma’ sensiela ta’ kundanni; min-Nazzjonijiet Magħquda, mir-Renju Unit, Franza u mir-Russja fost l-oħrajn.

L-Uffiċċju għad-drittijiet tal-bniedem tan-Nazzjonijiet Magħquda kkundana l-vjolenza mill-forzi tas-sigurt,a f’Gaza u qal li jinsab imħasseb b’dak li jista’ jseħħ, waqt li sejjaħ għal investigazzjoni indipendenti.

“Again, we call for independent, transparent investigations into all cases of death and injury since the 30th of March. Since that date, 112 Palestinians, including 14 children, have lost their lives at the fence and thousands have been injured,” qal Rupert Colville, Kelliem għall-Kummissarju Għoli tan-Nazzjonijiet Magħquda għad-Drittijiet tal-Bniedem.

Min-naħa l-oħra l-Ambaxxatur tal-Istati Uniti għan-Nazzjoniijiet Magħquda faħħret il-mod kif Iżrael żamm kalm fil-konfront tal-Palestinjani. “No country in this chamber would act with more restraint than Israel has,” qalet Nikki Haley.

Il-Prim Ministru ta’ Iżrael Benjamin Netanyahu qal li l-militar aġixxa biex jiddefendi lilu nnifsu mit-tmexxija Iżlamista f’Gaza – il-Hamas – li skont Netanyahu trid teqred lil Iżrael.

Uffiċjali Palestinjani qalu li mal-elfejn u seba’ mitt elf persuna ndarbu f’dak li sejħu massakru. Huma sostnew li l-protesti kienu ġustifikati għax il-Lvant ta’ Ġerusalemm huwa tagħhom u jqisu d-deciżjoni ta’ Trump li jiftaħ ambaxxata hemm bħala ksur ta’ ftehim. Il-militar Iżraeljan min-naha tiegħu iddefenda ruħu billi qal li spara biss fuq dawk li sejjaħ bħala “terroristi”.

Aħbarijiet Oħra
Barranin

Ġew ippubblikati l-ewwel 3 ritratti uffiċjali tat-tieġ irjali tal-Prinċep Harry u Meghan Markle. Id-Duka u d-Dukessa ta’ Sussex għażlu lill-fotografu Alexi Lubomirski sabiex jieħu r-ritratti tal-ewwel mumenti fil-ħajja miżżewġa tagħhom….

Barranin

Telgħu għal 111 l-għadd ta’ persuni li tilfu ħajjithom fit-tiġrif tal-ajruplan fil-Kuba nhar il-Ġimgħa, wara li waħda minn dawk li salvaw, mietet fi sptar f’Havana. Il-persuna ġiet identifikata bħala Grettel…

Barranin

Qorti fl-Awstralja sabet lill-Arċisqof Philip Wilson ħati li ħeba abbużi sesswali fuq tfal. Il-każijiet imorru lura għas-snin sebgħin. Philip Wilson, li huwa l-Arċisqof ta’ Adelaide, huwa l-ewwel saċerdot kattoliku fid-dinja…

Barranin

Tmenin ġurnata mindu saret l-elezzjoni, l-Italja tinsab qrib li jkollha Prim Ministru ġdid. L-isem propost hu Giuseppe Conte, Professur fil-liġi ta’ 54 sena mill-belt ta’ Foggia fir-reġjun ta’ Puglia… qajla…

Aktar