Lokali
Il-Papa se jiddeċiedi jekk jippubblikax ir-rapport tal-Arċisqof Scicluna dwar abbuż sesswali

Fi tmiem missjoni pastorali fiċ-Ċili bħala mibgħut speċjali tal-Papa Franġisku, l-Arċisqof Charles J. Scicluna qal li hu f’idejn il-Papa jekk jippubblikax ir-rapport dwar l-abbużi sesswali u jgħaddihx lill-awtoritajiet ċivili tac-Ċili. Din kienet it-tieni żjara ta’ Monsinjur Scicluna fiċ-Ċili. Fi Frar li għadda hu ġabar ix-xhieda tal-vittmi tal-abbużi sesswali minn membri tal-kleru f’rapport ta’ 2,300 paġna.

L-Arċisqof Charles J. Scicluna temm il-missjoni fiċ-Ċili bħala mibgħut tal-Papa Franġisku. Akkumpanjat minn Monsinjur Jordi Bertomeu, fl-aħħar tmint’ijiem huma ltaqgħu ma’ mijiet ta’ persuni fil-kapitali Ċilena u rċevew ukoll numru ta’ ittri dwar l-iskandlu tal-abbuż sesswali minn membri tal-kleru Ċilen.

Għarkupptejh quddiem miġemgħa ta’ Kattoliċi Ċileni fil-Katidral ta’ Osorno, l-Arċisqof Scicluna talab apoloġija f’isem il-Papa Franġisku.

Din l-apoloġija qasmet lill-membri tal-Knisja f’Osorno, b’uħud minnhom għadhom mhumiex lesti li jaċċettawha.

F’konferenza tal-aħbarijiet, l-Arċisqof Scicluna qal li hija deċiżjoni tal-Papa Franġisku jippubblikax ir-rapport ta’ 2,300 paġna bix-xhieda tal-allegati vittmi ta’ abbużi seswali. Ir-rapport jakkuża lill-Isqfijiet Ċileni b’negliġenza gravi fil-mod kif indirizzaw l-allegazzjonijiet ta’ tfal li ġew abbużati u jgħid li tħassret l-evidenza ta’ reati sesswali.

Mistoqsi jekk il-Vatikan hux se jgħaddi r-rapport lill-awtoritajiet ċivili taċ-Cili, Monsinjur Scicluna qal li l-libertà u l-awtonomija tal-Knisja Kattolika għandha tiġi rispettata. Qal li r-raport mhux tiegħu imma tal-Papa.

Id-dikjarazzjoni saret fl-isfond ta’ rapporti ġodda b’allegazzjonijiet oħra ta’ abbużi fi bliet Ċileni ta’ Aysen u Temuco.

Fl-aħħar jiem, il-Pulizija Ċilena wettqet numru ta’ raids għall-għarrieda f’uffiċini tal-Knisja, minn fejn ħadet dokumenti relatati ma’ dawn il-każi.

Aħbarijiet Oħra
Ambjent

Il-Wasteserv bdiet il-proċess biex tkabbar il-faċilitajiet tagħha fil-Magħtab. Madwar għoxrin bidwi fl-inħawi li bejniethom għandhom madwar 250,000 metru kwadru ta’ raba’ ġew infurmati li l-Wasteserv qed tikkunsidra li tespropja din…

Kronaka

Raġel ta’ nazzjonalità barranija ġie arrestat wara li allegatament saq fuq uffiċjal tal-pulizija. L-inċident seħħ għall-ħabta tas-17:30 fl-akkwati ta’ Buġibba u ġie arrestat ftit tal-ħin wara fil-Mellieħa. Aktar dettalji fil-ħin…

Lokali

Il-kumpanija Steward Health Care Malta ppreżentat lill-Awtorita tal-Ippjanar applikazzjoni ta’ żvilupp għall-Isptar San Luqa biex fi kliemha jerġa’ jingħata l-ħajja bħala sptar modern li jinkludi aċċessibiltà aħjar għall-ispazji miftuħin u…

Għawdex

Għadha attiva ħafna fuq l-aġenda tal-gvern l-idea li Malta jkollha sistema ta’ metro, tant li l-Ministru Ian Borg ikkonferma ma’ TVM li l-istudju dwar dan jinsab fl-aħħar fażi tiegħu u…

Aktar