Barranin
Il-PM tal-Kanada jgħid li l-ajruplan f’Tehran x’aktarx iġġarraf b’missila tal-Iran

Il-Prim Ministru tal-Kanada, Justin Trudeau, qal li l-ajruplan li ħalla 176 mejta wara li ġġarraf fl-Iran, x’aktarx kien intlaqat minn missila Iranjana.

Trudeau qal li dan qed joħroġ minn investigazzjonijiet tal-awtoritajiet Kanadiżi u anki minn intelliġenza ta’ sorsi oħrajn. Indika li l-missila setgħet laqtet l-ajruplan bi żball.

L-Iran qed jiċħad li l-ajruplan intlaqat b’missila minn tiegħu, u stieden lill-qawwiet tal-Punent biex jassistu fl-investigazzjoni.

Fl-istess ħin li ġġarraf l-ajruplan tal-linja tal-ajru Ukrena, li kien sejjer lejn Kjiv, l-Iran kien qed jispara missili lejn bażijiet militari Amerikani fl-Iraq, b’ritaljazzjoni għall-qtil tal-Ġeneral Iranjan Qasem Soleimani.

Il-President Amerikan Donald Trump għadu ma kkummentax b’mod dirett dwar din l-intelliġenza, iżda qal li għandu s-suspetti tiegħu dwar dak li seħħ, u li t-tiġrif tal-ajruplan seta’ kien żball.

Il-Prim Ministru tar-Renju Unit, Boris Johnson, tkellem fuq l-istess linji tal-Prim Ministru Kanadiż u talab investigazzjoni fil-fond.

Minbarra Iranjani, fuq l-ajruplan kien hemm ukoll passiġġiera Kanadiżi, Amerikani u Ingliżi.

Aħbarijiet Oħra

L-Awstralja rnexxielha tirreġistra rekord bl-inqas każijiet ta’ Covid-19 fi tlett xhur, fejn irrapportat biss 18-il każ ġdid. Fl-istat ta’ Victoria li kien meqjus bħala l-epiċentru għall-virus irreġistra biss 14-il każ…

Il-kumpannija TikTok fl-Istati Uniti qalet li ftehim bejn il-kumpannija Ċiniża u dawk Amerikani Oracle u Walmert wassal biex dan l-app tant popolari mat-tfal, żgħażagħ u anki adulti jibqa’ jopera fl-Istati…

Il-President Amerikan Donald Trump qal li l-ġimgħa d-dieħla se jinnomina mara biex timla l-post vakanti tal-Imħallef tal-Qorti Suprema Ruth Bader Ginsburg li mietet jumejn ilu fl-età ta’ 87 sena. Ġimgħat…

Uffiċjali tal-FBI kkonfermaw li rnexxielhom jintraċċaw u jwaqqfu pakkett indirizzat lil Trump li kien mimli bil-velenu ricin. Il-pakkett kellu jasal il-White House iżda l-FBI u uffiċjali tas-Servizzi Sigrieti rnexxielhom jintebħu…

Aktar