Politika
Il-PN jwiegħed li Għawdex ikun meqjus bħala gżira reġjun fil-Kostituzzjoni

Il-Kap tal-Oppożizzjoni u tal-Partit Nazzjonalista Adrian Delia wiegħed li gvern nazzjonalista ser jara li Għawdex ikun meqjus bħala gżira reġjun fil-kostituzzjoni biex l-Għawdxin ikollhom il-poter jiddeċiedu fuq il-ħtiġijiet tagħhom. Huwa qal li l-gvern wiegħed ħafna proġetti lill- Għawdxin li baqgħu ma twettqux u kkritika lill-gvern għall-bejgħ tal-uniku sptar f’Għawdex.

Il-Kap tal-Oppożizzjoni u tal-Partit Nazzjonalista wiegħed li jrid jagħti lill-Għawdex l-istat ta’ gżira reġjun fil-Kostituzzjoni biex l-Għawdxin jingħataw poteri eżekuttivi biex jiddeċiedu dwar il-ħtiġijiet ta’ Għawdex.

Fl-ewwel sessjoni tal-Kunsill Ġenerali tal-Partit Nazzjonalista f’Għajnsielem, Dr Delia qal li Gvern Laburista wiegħed ħafna lill-Għawdxin u baqa’ ma wettaq xejn. Huwa semma diversi proġetti mwegħda diversi drabi fosthom il-cruise liner terminal, il-yacht marina ġdida, binja ġdida għall-Qorti u skola primarja ġdida fir-Rabat Għawdex li suppost ilha lesta mill-2015. Qal li dawn kollha ma twettqux.

Dr Delia kkritika il-privatizzazzjoni tal-Isptar ta’ Għawdex, waqt li qal li l-Gvern ma jistax jibqa’ jistenna aktar imwiet qabel jieħu azzjoni konkreta dwar l-isptar. Huwa ddeskriva l-kuntrat tal-Isptar bħala malinn li sar biex xi ħadd jaqla’ l-miljuni minnu. Qal li sal-lum ħadd ma ħa r-responsabbiltà għall-mewt ta’ pazjent minħabba li s-servizz tal-ħelikopter kien wieqaf. Dr Delia qal li l-Gvern biegħ l-uniku sptar ta’ Għawdex mingħajr ma ta kas il-bżonnijiet tal-Għawdxin.

Il-Kap Nazzjonalista qal li l-Għawdxin għandhom bżonn investiment serju fil-konnettività biex ma jinqatgħux mill-kumplament ta’ Malta. Huwa kkritika lill-Gvern li qal neħħa s-servizz ta’ vapur għall-merkanzija minn Sa Maison, waqt li baqa’ ma investiex fir-raba’ vapur, u ma daħħalx il-fast ferry service. Huwa qal li l-Gvern issa qiegħed iwiegħed mina li għandha tal-inqas tmien snin oħra biex tinbena. Il-Kap Nazzjonalista staqsa kif se tissolva l-problema ta’ konnettività sakemm tkun lesta. Dr Delia saħaq dwar il-bżonn ta’ konsultazzjoni serja.

Huwa reġa’ kkritika l-politika tal-gvern li jkabbar l-ekonomija bil-popolazzjoni u qal li f’sitt snin ser ikun hawn aktar ħaddiema barranin milli ħaddiema Maltin mal-privat. Semma kif l-istudenti Għawdxin spiċċaw b’kirjiet għoljin f’Malta u stqarr li sar aktar ogħli tikri appartament f’Malta milli fl-Italja. Il-Kap Nazzjonalisa qal li fejn il-Gvern jiżbalja, l-Oppożizzjoni lesta tressaq is-soluzzjonijiet. Dr Delia saħaq dwar il-bżonn ta’ viżjoni ħolistika għal Għawdex bi pjan soċjo-ekonomiku li joffri miżuri għaż-żmien qasir medju u fit-tul.

 

Aħbarijiet Oħra
Air Malta

Il-Ministru għat-Turiżmu, Konrad Mizzi qal li fil-jiem li ġejjin se jitħabbru riżultati finanzjarji pożittivi għal-linja nazzjonali tal-ajru. Fil-ftuħ tal-fiera annwali tal-ivjaġġar, l-AMITEX, il-Ministru qal li l-viżjoni tal-Gvern hi li l-Air…

Politika

Fi Brussell, kien hemm ukoll il-Kap tal-Partit Nazzjonalista, Adrian Delia, li attenda għal-laqgħa tal-kapijiet tal-partiti membri tal-Partit Popolari Ewropew. Stqarrija tal-Partit Nazzjonalista kkowtat lil Dr Delia jgħid li jeħtieġ li…

Politika

Il-Prim Ministru Joseph Muscat qal li r-realtà fid-drama dwar Brexit hi li jiġri x’jiġri, l-UE se tkun qed ittawwal il-ħruġ tar-Renju Unit mill-UE b’ġimgħa biss, għax jekk il-ġimgħa d-dieħla il-Parlament…

Sport

Sens kbir ta’ sodisfazzjon u arja ta’ festa fost il-kontinġent Malti li kkompeta fil-logħob dinji tal-Ispecial Olympics. It-28 atleta b’diżabbiltà intellettwali ġejjin lura Malta b’erbgħin midalja, 12 minnhom tad-deheb. L-atleti…

Aktar