Politika Lokali
Il-PN u l-PL jirreaġixxu għar-rapport tal-EBA dwar l-FIAU

Wara r-rapport tal-Awtorità Bankarja Ewropea (EBA), il-Partit Nazzjonalista sejjaħ biex il-Ministru għal-Finanzi, Edward Scicluna, jerfa’ r-responsabbiltà politika għaliex qal li Malta ma tistax tistenna aktar għal azzjoni effettiva biex ma tkomplix issir ħsara lir-reputazzjoni tal-pajjiż.

F’konferenza tal-aħbarijiet fil-Parlament, il-kelliema għas-Servizzi Finanzjarji, Kristy Debono, iddeskriviet ir-reazzjoni tal-FIAU ghar-rapport bħala patetika u arroganti. Appellat biex l-FIAU tieħu azzjonijiet immedjati biex tibda tissewwa l-ħsara li saret lir-reputazzjoni ta’ Malta u lill-istituzzjonijiet li twaqqfu biex bnew l-industrija tas-servizzi finanzjarji fl-aħħar 30 sena.

Il-kelliem tal-Finanzi, Mario de Marco, qal li l-awtoritajiet Maltin naqsu bil-kbir u għalhekk insista li tintrefa’ r-responsabbiltà politika mill-Gvern Laburista li qal hu qrib is-sid tal-Pilatus li issa hu mixli b’ħasil ta’ flus anke fl-Amerika u allega li hemm x’juri li ħasel flus maħmuġin għal nies fil-Gvern.

Dr de Marco qal li r-responsabilità politika trid tintrefa’ b’mod speċjali mill-Ministru Edward Scicluna li, flok aġixxa biex ma ssirx ħsara lir-reputazzjoni ta’ Malta, kompla għarraqha b’kummenti inaċċettabbli fejn minflok attakka t-tixħim u l-ħasil tal-flus, attakka lil min kien dmiru jikxifhom, tant li min kixef tkeċċa.

Il-kelliema tal-Oppożizzjoni qalu li f’pajjiżi serji, rapport bħal dak tal-Awtorità Bankarja Ewropea, jwassal għal riżenji immedjati u għal azzjoni biex Malta toħroġ mill-kollass li sofriet fir-reputazzjoni taghha fl-aħħar sentejn u nofs.

Ir-reazzjoni tal-Partit Laburista

Il-Partit Laburista min-naħa tiegħu qal li hi biss ix-xewqa tal-Partit Nazzjonalista li jirriżenja l-Ministru Edward Scicluna, li qal lagħab parti kruċjali biex Malta għandha surplus flok defiċit u tkabbir ekonomiku.

Fi stqarrija, il-Partit Laburista qal li bis-saħħa tal-Ministru Scicluna, ir-reputazzjoni ta’ Malta hija b’saħħitha.  Fakkar li fl-aħħar xhur il-Ministru Scicluna stess ħa passi ġodda fil-ġlieda kontra l-ħasil tal-flus bl-implimentazzjoni ta’ direttivi tal-Unjoni Ewropea u tfassil ta’ politika biex tiġġieled dawn il-fenomeni.

Dwar ir-reputazzjoni ta’ Malta, il-Partit Laburista qal li din ġiet ikkonfermata llum stess bit-tbassir ekonomiku tal-Kummissjoni Ewropea u mill-għadd kbir ta’ kumpaniji ta’ fama internazzjonali li fl-aħħar ġimgħat għażlu Malta biex jibdew jew jespandu l-operat tagħhom.

Il-Partit Laburista qal li r-reazzjoni tal-kelliema Nazzjonalisti turi d-dagħdigħa negattiva tal-Partit Nazzjonalista li qed jogħrok idejh għal rapport tal-Awtorità Bankarja Ewropea.

Il-Partit Laburista qal li l-Bank Pilatus inġab Malta mill-ekx Ministru Tonio Fenech u l-proċess biex ingħata l-liċenzja sar mill-awtoritajiet maħtura fi Gvern Nazzjonalista. Żied jgħid li l-istituzzjonijiet Maltin ħadu passi iebsa kontra l-Bank Pikatus meta sar magħruf li s-sid tal-bank qed ikun akkużat fuq reati f’pajjiż ieħor.

Ara wkoll:

AĠĠORNAT: L-EBA twiddeb lill-FIAU dwar il-Bank Pilatus – l-FIAU ma taqbilx mal-konklużjoni tal-EBA

Aħbarijiet Oħra
Xogħol

Il-General Workers Union qed issejjaħ għal emendi fil-liġi tax-xogħol biex il-prinċipju ta’ ħlas ugwali għall-istess xogħol jitwessa’ u jkopri lill-ħaddiema kollha li jaħdmu f’azjenda, inkluż dawk li m’humiex f’impjieg dirett…

Temp

L-uffiċċju meterjoloġiku qed ibassar riħ qawwi ħafna għal għada l-Ħadd 24 ta’ Frar. Jidher li r-riħ se jilħaq il-qawwa ta’ riefnu (forza 8-9) mal-jum ta’ għada. It-temp mistenni jkun imsaħħab…

Kronaka

Persuna ġarrbet xi ġrieħi wara li kienet involuta f’inċident fuq il-baħar fl-inħawi ta’ Fra Ben, fil-Qawra. Il-każ seħħ għall-ħabta tat-3.00 ta’ waranofsinhar. TVM infurmat li fil-ħin tal-inċident il-persuna kienet fil-baħar…

Aktar