Kultura
Il-portiku tal-knisja ta’ San Bastjan se jinħatt ġebla ġebla u jinbena mill-ġdid

Il-portiku tal-knisja ta’ San Bastjan fir-Rabat se jkollu jinħatt ġebla ġebla, bix-xogħol irid isir pari passu max-xogħol li qed isir għall-bini mill-ġdid tat-triq ta’ quddiem il-knisja.

Il-portiku, li hu l-parti ta’ quddiem il-faċċata tal-knisja, ilu tliet snin imdawwar bil-ħadid biex ma jkomplix jiġġarraf.

Diversi jagħrfuha minn fuq il-qoxra tal-ktieb ta’ Kilin ‘Fuq l-għajn ta’ San Bastjan’. Din il-knisja fir-Rabat, li tinsab fit-triq li mis-Saqqajja tagħti lejn il-Buskett u Ħad Dingli, illum tinsab moħbija wara struttura tal-ħadid li twaqqfet tliet snin ilu bħala lqugħ għall-portiku u l-pilastri milli jċedu.

L-Arċipriet tar-Rabat, il-Kanonku Louis Suban, qal li l-ħsara tidher li qiegħda fil-portiku, li ilu snin jinbeżaq ‘il barra.

”Fl-2016 qabbadt kumpanija biex jagħmlu monitoring u waqt li kienu qed jagħmlu l-monitoring waqa’ ħafna ġebel dak il-ħin stess u qaluli hemm bżonn isir xi ħaġa. Għamilna dan il-ħadid bħala lqugħ biex ma taqax u ma tkunx ta’ periklu għan-nies.”

Il-Perit Glorianne Camenzuli qalet li l-ħsara ġiet ikkawżata minn diversi elementi. Fost oħrajn, il-volum qawwi ta’ traffiku li jgħaddi mit-triq, waqt li kanali għall-għarar li saru fis-snin sittin setgħu naqqsu mis-saħħa tal-pedament tal-portiku.

”Kien hemm xi corrosion min-naħa tal-gate nnifisha li hija tqila għall-pilastri li hemm bħalissa u bdil li sar fit-toroq viċin ħafna l-istess pilastru.”

Il-Perit qalet li l-pjan hu li l-ħidma ssir b’mod konġunt max-xogħol li għaddej bħalissa fl-infrastruttura ta’ Triq George Borg Olivier.

”L-idea hi li tiżżarma ġebla ġebla, jigu innumerati, preferibbilment jiġu stored fuq il-post u terġa’ titla’ l-istruttura eżatt kif kienet u x-xogħol jinvolvi r-restawr tal-faċċata ukoll.”

Il-knisja nnifisha ddedikata lil San Bastjan, ma jidhirx li għandha problemi strutturali, tant li fiha kuljum tiġi ċċelebrata quddiesa bin-nies jużaw bieb fil-ġenb. L-Arċipriet Suban qal li din hi l-eqdem knisja f’Malta ddedikata lil San Bastjan, tant li l-knisja oriġinali inbniet fl-1477, għalkemm dik tal-lum ġiet modifikata fl-1751 kif jixhed l-istil barokk.

Aħbarijiet Oħra
Stejjer Umani

F’aktar minn ħamsin sena, l-Għaqda Alkoħoliċi Anonimi għenet mijiet ta’ persuni bi problema ta’ xorb żejjed, u ħafna drabi anke lill-qraba tagħhom permezz tal-AL-ANON. TVM tkellem ma’ raġel li 27…

Infrastruttura

Għaddejin l-aħħar tħejjijiet għat-tlestija ta’ Triq Ħal Luqa, li hija l-arterja ewlenija bejn Santa Luċija u Ħal Luqa. Bejn it-Tlieta filgħodu u l-Erbgħa waranofsinhar, it-triq se tingħalaq f’direzzjoni waħda sakemm…

Trasport

Matul l-aħħar snin, Transport Malta flimkien mal-Ministeru tat-Trasport nedew diversi skemi fuq ix-xiri ta’ mezzi tat-trasport biex jonqos it-tniġġis tal-arja. Tnejn mill-iskemi li qed jagħtu riżultati huma għax-xiri tal-karozzi elettriċi…

Aktar