Lokali
Il-Prim Ministru bi twissija ċara lill-piloti lejlet li se jivvutaw fuq l-offerta tal-Gvern

Lejliet li l-piloti tal-Airmalta ser jivvutaw fuq l-aħħar proposti tal-Gvern dwar il-ftehim kollettiv, il-Prim Ministru Joseph Muscat iddikjara ċar u tond li l-Gvern mhux ser jiġi rikattat u lest għal kull deċiżjoni biex jiddefendi l-interessi kollha tal-Airmalta u tal-akbar stakeholder tal-kumpanija li hija l-industrija tat-turiżmu u l-ekonomija tal-pajjiż.

Il-Prim Ministru u Mexxej tal-Partit Laburista Joseph Muscat żvela li l-pakkett li l-Gvern qed joffri lill-bdoti tal-Air Malta li qal jammonta għal żieda ta’ €72,000 fis-salarji tal-1st officers; u żieda ta’ 105,000 lill-kaptani fuq medda ta’ ħames snin.

F’attività politika f’Birkirkara, Dr Muscat bagħat messaġġ ċar lill-piloti li mhux aċċettabbli għall-Gvern ma jaċċettawx iż-żidiet iżda jibqa’ jaħdmu kif inhuma mingħajr ma jżiedu s-siegħa tax-xogħol skont ir-regoli fl-avvjazzjoni. Saħaq li l-impjieg tal-piloti mhuwiex part time. Huwa wissa’ li l-piloti qed ifittxu skużi biex jordnaw azzjonijiet industrijali, imma l-Gvern mhux ser iċedi għar-rikatt għaliex l-interess tiegħu mhux ta’ grupp żgħir iżda tal-poplu u tal-pajjiż kollu.

Qal li l-Gvern jippretendi li l-piloti jżiedu s-sigħat ta’ ħidma skont regoli tal-industrija biex l-Airmalta twettaq l-istrateġija li magħha qablu wkoll il-bdoti biex tikber u ssir il-linja tal-ajru tal-Mediterran.

Il-Prim Ministru qal li qalulu li l-ebda Prim Ministru ma ġabha żewġ mal-bdoti, iżda Dr Muscat iddikjara li din id-darba, huwa deċiż li ma jitpoġġiex f’kuntuniera. Stqarr li l-Gvern lest għal kull eventwalità biex jiddefendi l-interess nazzjonali. Wera tama li l-Oppożizzjoni tkun mal-Gvern f’din il-kwistjoni kif qal li huma l-korpi kostitwiti.

Dr Muscat qal li din is-sena se terġa’ tkun sena ta’ suċċess għal ekonomija u ser tikser kull rekord għall-pajjiż, il-familji u għan-negozji u l-Gvern ser ikun qed iqassam il-ġid biex jilħaq kull rokna. Huwa qal li filwaqt li l-Gvern irid jaħdem mal-privat waqt li l-Oppożizzjoni issa ddikjarat li trid li l-investiment issir mill-Gvern billi jiddejjen. Dr Msucat qal li dal-Gvern ma jridx jagħmel bħal gvernijiet ta’ qabel li jħalli d-dejn biex iħallsuh ulied uliedna. Qal li l-ġenerazzjoni tal-futur irid iħallilhom il-ġid u mhux id-dejn.

Dwar ir-riforma fl-enerġija, qal li din kienet għaqlija għax li kieku bħalissa qed nitkellmu dwar żidiet fil-kontijiet tad-dawl u l-ilma fl-isfond taż-żidiet qawwija fil-prezzijiet internazzjonali taż-żejt. Qal li l-prezzijiet tad-dawl ser jibqgħu baxxi. Dwar iż-żieda fil-prezz tal-gass, qal li l-iktar ħaġa importanti hija li l-ftehim ser jorbot il-prezz għal sena sħiħa.

Dr Muscat tkellem dwar l-investiment fuq id-daħla tal-Belt u rrikonoxxa proġetti li saru mill-Gvern ta’ qabel. Huwa stieden lill-poplu kollu biex is-Sibt li ġej jattendi għall-ftuħ uffiċjali tal-Valletta 2018. Qal li dan huwa proġett li bdieh il-Gvern Nazzjonalista u tkompla minn din l-amministrazzjoni; u li hija festa li għandha tgħaqqad lil kulħadd.

Aħbarijiet Oħra
Lokali

Filmat li qed idur fuq il-Facebook ta’ ħaddiema ta’ kostruzzjoni jimlew trakk bit-terrapien qalb il-karozzi inkwieta lil diversi. Il-filmat kien meħud fi Triq Salvu Psaila, Birkirkara. Persuna li tkellmet ma’ TVM…

Ġurnali

Ħarsa lejn il-ġurnali tal-lum is-Sibt 21 ta’ Lulju L-Orizzont Fl-ewwel faċċata hemm tliet stejjer. Storja b’ritratt tal-Prim Ministru Joseph Muscat waqt l-inawgurazzjoni uffiċjali ta’ Pjazza de Paule fil-qalba ta’ Raħal…

Kronaka

Dik li kellha tkun ġurnata xogħol għal żewġ ħaddiema fuq il-monti spiċċat ħażin wara inċident tat-traffiku fl-Imsida. Iż-żewġ ħaddiema mill-Bangladesh, wieħed minnhom raġel ta’ 33 sena residenti l-Gżira ttieħdu l-isptar,…

Kronaka

Il-powerboat li ħarbet nhar il-Ħamis wara li tniżżlu ammont kbir ta’ sigaretti bil-kuntrabandu f’San Pawl il-Baħar instabet ilbieraħ filgħaxija (il-Ġimgħa) fuq il-baħar fl-inħawi tax-Xemxija. Id-dgħajsa nstabet abbandunata marbuta ma’ baga…

Aktar