Kronaka
AĠĠORNAT: Il-Pulizija tiċħad li Ferris ġie mhedded b’arrest – l-avukat tiegħu jippubblika l-mandat t’arrest

Il-Korp tal-Pulizija ċaħad li l-investigaturi heddew lil Jonathan Ferris li se jiġi arrestat.

Fi stqarrija, il-Pulizija qalet li qed tinvestiga għadd ta’ konklużjonijiet li ħarġu mill-inkjesta dwar Egrant. Dan wara li l-Maġistrat Aaron Bugeja għalaq l-inkjesta relatata mal-każ Egrant u bagħat l-istess rapport lill-Avukat Ġenerali u ordna biex tingħata kopja lill-Kummissarju tal-Pulizija biex jinvestiga għadd ta’ konklużjonijiet u jesegwixxi ordnijiet oħra li l-istess Maġistrat għamel fir-rapport.

Il-Korp tal-Pulizija qal li bħala parti mill-investigazzjonijiet li ntalab jagħmel, Jonathan Ferris ġie msejjaħ fil-Kwartieri Ġenerali tal-Pulizija biex ikun interrogat fuq il-każ. Spjegat li t-talba saret permezz ta’ telefonata u li Ferris ingħata ġurnata u ħin biex issir l-interrogazzjoni u ntalab li jieħu avukat tal-fiduċja tiegħu, iżda huwa għaraf lill-investigaturi li l-avukat tal-fiduċja tiegħu kien imsiefer.

Żied jgħid li s-Sur Ferris ingħata l-opportunitajiet kollha biex jieħu avukat ieħor jew jingħata appuntament ieħor konvenjenti għalih. Madankollu skont il-Korp tal-Pulizija, li kien Ferris innifsu li ssuġġerixxa lill-investigaturi li “jekk inhi daqshekk urġenti oħorġu mandat u ma nistax ngħidilkom mod ieħor”.

Żied jgħid li l-konverżazzjoni permezz ta’ ħames telefonati, li erbgħa minnhom għamilhom Ferris stess lill-Pulizija, huma kollha rrekordjati u fl-ebda ħin Ferris ma ġie mhedded.

Il-Korp saħaq li fl-ebda ħin l-investigaturi ma heddewh li kien se jiġi arrestat kif ġie allegat.

Sadanittant, ftit wara l-istqarrija tal-Pulzija, wieħed mill-avukati ta’ Jonathan Ferris, id-deputat Nazzjonlista Jason Azzopardi, fuq is-siti soċjali kiteb li l-istqarrija maħruġa mill-Pulizija hija malizjuża, mhux veritiera u qarrieqa.

Dr Azzopardi ppubblika l-mandat t’tarrest li ħareġ 48 siegħa qabel is-Sur Ferris mar id-depot għall-interrogazzjoni u allega li l-Pulizija m’għandhomx joħorġu stqarrijiet foloz biex jaħbu l-aġenda tagħhom.

Aħbarijiet Oħra
Politika

Il-Prim Ministru u Mexxej tal-Partit Laburista Joseph Muscat wiegħed lealtà sħiħa u spazju lis-suċċessur tiegħu u qal li hu se jibqa’ baħri flok kaptan. Dr Muscat li tkellem fi tliet…

Milied

Aktar ma joqrob il-Milied, aktar jirrankaw l-attivitajiet ta’ ġbir ta’ fondi għall-għaqdiet tal-karità . . . fosthom il-Fondazzjoni Malta Community Chest Fund, li hija l-benefiċċarja tal-attività Santa Swim, li issa…

Politika

Il-President Emeritu Marie Louise Coleiro Preca kitbet appell biex il-poplu Malti jingħaqad. Fuq Facebook Coleiro Preca kitbet li mill-istorja tal-pajjiż il-poplu dejjem waqaf għall-valuri tal-onestà, il-ġenwinità, l-altruwiżmu, il-bżulija, l-għaqal u l-intergrità….

Aktar