Lokali
Il-Qorti Maltija tqis il-parir ta’ avukati Ingliżi bħala attakk fuq is-sovranità ta’ Malta

Attakk fuq is-saltna tad-dritt f’Malta – l-Imħallef Silvio Meli

Il-Qorti, ippreseduta mill-Imħallef Silvio Meli, sejħet il-parir tad-ditta legali Ingliża lill-familja ta’ Daphne Caruana Galizia bħala attakk fuq is-saltna tad-dritt f’Malta, l-indipendenza u l-imparzjalità tal-ġudikatura Maltija.

L-Imħallef Meli qal dan fil-kawża tal-familja Caruana Galizia li qed jitolbu biex id-Deputat Kummissarju Silvo Valletta ma jkunx involut fl-investigazzjoni tal-qtil tal-ġurnalista għax huwa miżżewweġ lill-Ministru Justyne Caruana.

Doughty Street Chambers tgħid li l-investigazzjoni tikser id-drittijiet fundamentali tal-bniedem

Id-ditta legali Ingliża qalet li l-investigazzjoni qed tikser id-drittijiet fundamentali tal-bniedem fosthom minħabba s-sehem fiha tas-Sur Valletta.

L-Imħallef Meli sostna li Malta hija pajjiż indipendenti u sovran fl-Unjoni Ewropea daqs ħaddieħor. Qal li hu ma impressjonax ruħu bil-parir tad-ditta legali Ingliża. Huwa qal li din il-kawża qed tagħmel ħsara lil Malta.

L-Imħallef Meli stqarr li fil-passat huwa kien suġġett għall-kritika minn Daphne Caruana Galizia u għalhekk talab lill-partijiet jekk iriduhx jirrikuża ruħu mill-kawża.

Ma ntalbitx ir-rikuża tal-Imħallef Meli

L-Avukati Jason Azzopardi, Therese Comodini Cachia u Eve Borg Costanzi għall-familja Caruana Galizia u Victoria Buttigieg għall-Kummissarju tal-Pulizija Lawrence Cutajar u għas-Sur Valletta ma talbux ir-rikuża tal-Imħallef Meli.

L-Imħallef Meli appella liż-żewġ naħat biex isibu soluzzjoni amikevoli qabel mal-kawża tasal fl-istadju tal-ġbir tal-provi. Qal li jekk dan il-ftehim jintlaħaq, ikun qed jintbagħat messaġġ b’saħħtu li l-istituzzjonijiet f’Malta japplikaw is-saltna tad-dritt.

Il-familja ssostni li Silvio Valletta għandu jirtira mill-investigazzjoni – Dr Azzopardi

L-avukat Azzopardi qal li l-familja għadha ssostni li s-Sur Valletta għandu jirtira mill-investigazzjoni.

Il-kawża ġiet diferita għall-20 ta’ Diċembru sakemm ma tinstabx soluzzjoni qabel.

Aħbarijiet Oħra
Lokali

Il-Milied jiġi għal kulħadd u jferraħ bosta qlub. Żorna ċ-Centro Spero għal persuni nieqsa mid-dawl fejn ħassejna l-entużjażmu tal-persuni nieqsa mid-dawl li qed iħejji għal produzzjoni tal-Milied bi drama u…

Ekonomija u Finanzi

Statistika tal-Eurostat uriet li fl-2016, in-nefqa ta’ Malta f’għajnuniet soċjali kienet inqas mill-medja Ewropea. Fil-fatt Malta kienet f’sitt post mill-aħħar fost 28 pajjiż tal-Unjoni Ewropea li tonfoq fuq servizzi soċjali….

Brexit

Tkompli titħabbel il-kobba dwar Brexit wara li fl-aħħar jiem il-Prim Ministru Theresa May tidher li spiċċat b’idejha f’idejha meta ma kisbitx garanzija ta’ assigurazzjonijiet dwar il-fruntiera tal-Irlanda mill-mexxejja tal-Unjoni Ewropea….

Brexit

Il-korrispondent tal-BBC, Chris Morris, f’kummenti esklussivi lil Television Malta, stqarr li l-Prim Ministru Ingliża Theresa May s’issa għadha ma kisbitx dak mistenni minn ħafna Parlamentari Ingliżi biex jaċċettaw il-ftehim li…

Aktar