Lokali
Il-Qorti titlob biex kumpaniji li ma jħallsux lill-ħaddiema jibdew jiġu mxandra

Il-Qorti ssuġġeriet li l-Gvern għandu jibda jxandar l-ismijiet ta’ dawk il-kumpaniji li ma jħallsux u jisfruttaw lill-ħaddiema, ħalli b’hekk jiġi avżat min ikun beħsiebu jmur jaħdem magħhom.

Din it-talba saret hekk kif il-Qorti, ippreseduta mill-Maġistrat Joseph Mifsud, kienet qed tgħaddi ġudizzju fuq omm u bintha li ma ħallsux lil ħaddiem il-paga dovuta lilu, u li diġà kellhom lista twila ta’ każijiet simili.

Mary Rose Vella u bintha Charmaine Vella kienu ordnati jħallsu multa ta’ €1,000 kull wieħed bħala diretturi tal-Hotel Xlendi Resort and Spa, kif ukoll iħallsu lill-ex impjegat tagħhom Ian Scott Moyes l-ammont ta’ €3,252 f’paga li baqa’ ma ħax.

Fil-Qorti Charmaine Vella ammettiet li l-ħaddiem kien dovut dan l-ammont, iżda qalet li ma tridx tħallsu qabel ma jagħmel apoloġija pubblika għall-ħsara li għamel lilha u lil familtha.

Il-Qorti qalet li dan l-argument ma jreġix, u li l-familja Vella setgħet fetħet proċeduri legali kontra l-ex impjegat, iżda ma kellhiex dritt iżżommlu l-paga tax-xogħol li kien għamel.

Wara li nnutat li dan ma kienx l-ewwel każ tagħhom, il-Qorti rrimarkat li dan l-aġir jammonta għal sfruttament tal-persuna, u ssuġġeriet li d-dipartiment governattiv konċernat li jirċievi lmenti konsistenti minn ħaddiema li ma jitħallsux għandu jibda javża lill-pubbliku bihom.

Aħbarijiet Oħra
Infrastruttura

Il-Grupp Express, li jopera fit-trasport u l-loġistika, waqqaf kumpanija ġdida fl-industrija tal-manifattura: Express Trailers Engineering. Din il-kumpanija se timpjega 25 ħaddiem, u se jaħdmu xogħol ikkummissjonat minn kumpanija Żvediża li…

Annimali

Uħud sufin u oħrajn qishom tigri żgħar – qtates ta’ razez differenti qed jikkompetu f’wirja internazzjonali li qed issir f’Malta li tixhed ukoll id-dilletanti numeruzi ta’ dawn l-annimali domestiċi. Aktar…

Ekonomija u Finanzi

L-aġenzija internazzjonali Standard and Poor ikkonfermat ir-rating ta’ Malta fil-Livell A- bi prospetti pożittivi wara li l-ekonomisti tagħha sabu li l-ekonomija Maltija kompliet tikber b’pass mgħaġġel, b’żieda fl-impjiegi u tnaqqis…

Festi

Il-festi titulari fl-istaġun sajfi ġew iċċelebrati kollha. Iżda l-festi għadhom għaddejjin. Fil-fatt, fi tmiem din il-ġimgħa qed jiġu ċċelebrati ħafna festi żgħar f’kappelli li għandna f’Malta u Għawdex. Waħda minnhom…

Aktar