Kronaka
Il-qtil ta’ DCG: Rapport minn Reporters Without Borders u The Shift News

Lejlet it-tieni anniversarju mill-qtil ta’ Daphne Caruana Galizia tnieda rapport imħejji minn Reporters Without Borders u The Shift News dwar ċ-ċirkostanzi li fihom seħħ il-qtil, l-investigazzjoni li saret dwaru, ir-reazzjoni internazzjonali għall-qtil u l-passi urġenti li jeħtieġ li jittieħdu biex issir ġustizzja.

Reporters Without Borders, rappreżentant tal-OSCE fuq il-media ħielsa u d-Direttur tal-Fondazzjoni Ġustizzja għall-Ġurnalisti sejħu għal azzjoni konkreta dwar il-qtil ta’ Daphne Caruana Galizia. F’konferenza tal-aħbarijiet, qalu li sal-lum il-familja Caruana Galizia għadha qed taffaċċja 26 kawża ta’ malafama u appellaw biex il-Prim Ministru u uffiċjali oħra jwaqqgħu dawn il-kawżi. Il-kelliema kkritikaw il-fatt li tifkiriet tal-vittma f’riġlejn il-monument tal-Assedju l-Kbir fil-Belt qed jitneħħew.

Ir-rappreżentant tal-OSCE fuq il-media ħielsa, Harlem Désir qal li laqgħa li kellu mal-Prim Ministru tħassret. Fil-preżenza ta’ qraba ta’ Daphne Caruana Galizia, fosthom il-ġenituri tagħha, qal li hija saret simbolu ta’ kuraġġ.

Il-media ngħatat rapport imħejji minn Reporters Without Borders u The Shift News li jallega li ħarġu aktar fid-deher in-nuqqasijiet f’Malta, li ppermettaw li tinqatel ġurnalista u li qed ikomplu jxekklu l-isforzi biex issir ġustizzja. Skont ir-rapport, l-impunità f’dan il-każ għandha implikazzjonijiet perikolużi għas-sigurtà tal-ġurnalisti, il-libertà tal-istampa u d-demokrazija mhux biss f’Malta imma madwar l-Ewropa u lil hinn.

Iż-żewġ għaqdiet rakkomandaw lill-awtoritajiet Maltin biex fost oħrajn li mingħajr dewmien isiru investigazzjonijiet kriminali effettivi u trasparenti dwar dan il-qtil u jiżguraw li l-ġuri tat-tliet persuni mixlija li wettqu d-delitt isir b’mod ġust u mingħajr dewmien.

Intant, fuq talba ta’ Reporters Without Borders, rappreżentanti tal-organizazzjoni ltaqgħu mal-Prim Ministru Joseph Muscat, u ddiskutew il-qtil ta’ Daphne Caruana Galizia u s-sitwazzjoni tal-media f’Malta. L-Uffiċċju tal-Prim Ministru qal li l-laqgħa kienet opportunità għal diskussjoni libera u bdil ta’ ideat bejn iż-żewġ delegazzjonijiet. Id-delegazzjoni tal-gvern kienet tinkludi lill-Ministri Owen Bonnici u Carmelo Abela, u l-Avukat Ġenerali, Peter Grech.

Aħbarijiet Oħra
Lokali

Yorgen Fenech li nżamm mill-Pulizija għall-investigazzjonijiet relatati mal-assassinju tal-ġurnalista Daphne Caruana Galizia għall-ħabta tad-disgħa ta’ filgħaxija ingħata l-police bail wara madwar 39 siegħa arrestat. Television Malta huwa infurmat li Yorgen…

Politika

Il-Kap tal-Oppożizzjoni u tal-Partit Nazzjonalista, Adrian Delia, illum laqqa’ l-Grupp Parlamentari tal-PN b’urġenza biex jiddiskuti l-iżviluppi dwar il-qtil ta’ Daphne Caruana Galizia u l-arrest ta’ Yorgen Fenech. Fi stqarrija l-Partit…

Qorti

Tliet irġiel ta’ bejn id-19 u t-42 sena ġew akkużati li serqu kaxxi mimlija prodotti tal-ġobon minn kontejner. Fil-Qorti l-imputati ammettew il-ħtija, bil-Maġistrat Monica Vella tikkundanna lil Daren Charles Aquilina…

Qorti

Tliet żgħażagħ, tnejn minnhom minuri ta’ 15 u 16-il sena, u ieħor ta’ 19-il sena, ingħataw il-ħelsien mill-arrest wara kważi tmien xhur taħt arrest. Dawn jinsabu akkużati b’attività terroristika wara li…

Aktar