Trasport
Il-vetturi elettriċi telgħu għal 1,000 – se jiżdiedu l-postijiet fejn tiċċarġja

Matul l-aħħar snin, Transport Malta flimkien mal-Ministeru tat-Trasport nedew diversi skemi fuq ix-xiri ta’ mezzi tat-trasport biex jonqos it-tniġġis tal-arja. Tnejn mill-iskemi li qed jagħtu riżultati huma għax-xiri tal-karozzi elettriċi u l-użu ta’ muturi b’magna żgħira.

TVM tkellem ma’ uffiċjal ta’ Transport Malta dwar l-inċentivi u l-benefiċċji ta’ dawn l-iskemi.

L-iskema għal min jagħżel li jwarrab il-vettura qadima tiegħu mit-triq biex idaħħal waħda aktar ġdida li tniġġes inqas, speċjalment jekk il-karozza tkun taħdem bl-elettriku, qed titqies minn Transport Malta bħala waħda mfittxija ħafna.

Gilbert Agius, Direttur fi ħdan Transport Malta, qal lil TVM li s’issa hawn ‘il fuq minn 1,000 vettura jaħdmu bl-elettriku. Dan qed iwassal biex Transport Malta ssaħħaħ l-infrastruttura, u ser iżżid l-ammont ta’ charging points mal-madwar 100 li diġà hawn bħalissa.

“Qed naħsbu biex inżidu madwar 130 charging point oħra, u 20 minnhom ikunu fast charge, biex dak li jkun jista jiċċarġja l-vettura bejn sagħtejn u tlett sigħat.”

Is-Sur Agius spjega l-inċentivi li żdiedu sew biex iħajjar aktar sewwieqa jagħżlu vetturi li jaħdmu bl-elettriku bħala parti mill-istrateġija biex jonqos t-tniġġis ikkawżat mill-karozzi li jaħdmu bid-diesel jew bil-petrol.

“Il-benefiċċju huwa kbir ħafna għax bażikament ma tħallasx taxxa tar-reġistrazzjoni fuq vettura li taħdem bl-elettriku li se timporta, kemm ġdida u kemm second hand, kif ukoll għandek l-ewwel ħames snin tal-liċenzja li hija b’xejn u mill-ħames sena ‘l fuq tħallas €10.”

Is-Sur Aguis qal li l-Gvern dis-sena alloka €600,000 għal sussidji fuq ix-xiri ta’ karozzi elettriċi li diġà ttieħdu kollha. Qal li Transport Malta applikat mal-Ministeru tal-Finanzi għal allokazzjoni oħra ta’ nofs miljun ewro. Is-Sur Agius qal li diġà għandhom ‘il fuq minn 170 applikazzjoni. Dan ifisser li kull sena l-vetturi elettriċi qed jiżdiedu bejn 150 u 200.

Intant, anke l-iskema li bdiet fl-2016, li tinkoraġġixxi aktar sewwieqa jagħżlu muturi żgħar minflok karozzi, kellha riżultati tajbin.

Gilbert Agius qal li muturi b’magna 125cc, jistgħu jinstaqu wara li s-sewwieqa jkunu segwew kors ta’ tahrig ta’ 10 sigħat. “Illum għandna kważi 8,000 persuna li għandhom din il-liċenzja. Bażikament qed ngħidu li jekk hawn 8,000 li ġabu liċenzja tal-125 qed ngħidu li hawn 8,000 persuna li jista’ ma jużax il-vettura tiegħu, imma qed juża l-mutur.”

Il-muturi b’magna 125cc jistgħu jinstaqu minn kull min ghalaq 18-il sena u għandu liċenzja kategorija B. B’dan il-mod tneħħa l-obbligu ghal liċenzja oħra biex isuq mutur.

Aħbarijiet Oħra
Stejjer Umani

Disk Jockey Ingliż kien Malta għal vaganza mas-sieħba tiegħu, li għal ftit ma ntemmitx fi traġedja. Huwa waqa’ m’għola erba’ sulari mill-gallarija tal-kamra tiegħu fil-lukanda Seabank, fil-Mellieħa. L-inċident seħħ fil-15…

Attività

Fl-okkażjoni tal-Ġimgħa għas-servizz pubbliku, matul il-ġurnata tal-Ħadd id-dipartiment tad-Dwana fetaħ il-bibien tiegħu għall-pubbliku f’Xatt Lascaris il-Belt. B’hekk il-pubbliku seta’ jara mill-qrib il-ħidma tal-uffiċjali tad-Dwana, li huwa dipartiment fi ħdan il-Ministeru…

Immigrazzjoni

Il-Forti Sant’ Anġlu, li għal medda ta’ snin kien l-għassies tal-kosta ta’ Malta, se jservi ta’ sfond għal-laqgħa tal-Ministri tal-Intern ta’ Malta, l-Italja, Franza u tal-Ġermanja, biex flimkien mal-Finlandja, li…

Politika

Il-Prim Ministru Joseph Muscat qal li kemm bl-iżviluppi li qed isiru fl-infrastuttura, u anki bid-deċiżjonijiet għaqlin li ħa dwar il-prezzijiet taż-żejt, il-Gvern qed jipprepara lill-pajjiż għall-futur. Il-Prim Ministru ddikjara l-fiduċja…

Aktar