Barranin
Il-WHO twissi li l-COVID-19 għadu ma għebx

L-Għaqda Dinjija tas-Saħħa wissiet biex l-imxija tal-Coronavirus ma terġax tgħolli rasha, għaliex il-virus għadu ma għebx. Dr David Nabarro, il-kelliem tal-WHO qal li għalkemm il-lockdowns bdew jintreħew, teħtieġ attenzjoni massima biex is-sitwazzjoni ma taħrabx minn idejn l-awtoritajiet tas-saħħa. L-Organizzazzjoni Dinjija tas-Saħħa wissiet li ħadd ma għandu jipprova jbassar meta l-Coronavirus ser jgħib għax anke jekk tinstab it-tilqima jkun jeħtieġ xogħol qawwi biex ikun ikkontrollat il-virus. Il-WHO ħabbret li ser twaqqaf fondazzjoni biex jinstabu aktar fondi biex tissaħħaħ is-saħħa pubblika. Jidher li din hija reazzjoni għal Donald Trump meta qal li jekk l-Organizzazzjoni ma tgħaddix minn riforma fi żmien 30 ġurnata jaqta’ l-ikbar kontribuzzjoni finanzjarja li għandha l-organizzazzjoni.

Intant, fil-Korea t’Isfel kellhom jingħalqu mitejn skola wara li l-każi ta’ Coronavirus reġgħu bdew telgħin. Wara li l-ħaddiema reġgħu lura lejn il-post tax-xogħol f’kumpanija wahda matul din il-ġimgħa kien hemm 82 infezzjoni. Il-kumpanija tħaddem aktar minn 4,000 ħaddiem li kollha kienu ttestjati għall-Coronavirus.

Fil-Brażil irrapurtati rekord ta’ kważi 27,000 każ ġdid. Bl-epiċentru tal-COVID-19 issa jidher li huwa l-Amerka t’isfel, il-Brażil huwa l-iktar milqut. Anke r-Russja irrapurtat żieda fl-infezzjonijiet b’Moska tkompli żżid fin-numru ta’ każi ta’ COVID-19 u taġġusta n-numru ta’ mwiet f’April għall-1,561 u mhux ta’ 639 kif irrappurtat qabel l-awtoritajiet f’Moska. Madwar id-dinja l-każi ta’ COVID-19 issa kważi laħqu s-sitt miljuni, mietu 360,000 u fiequ ftit inqas minn żewġ miljuni.