Lokali
Ilha 20 sena tarma fuq il-monti – tittama li l-bejjiegħa ma jibqgħux jarmaw u jżarmaw kuljum

Xogħol li jitlob li min jagħmlu jbakkar minn kmieni filgħodu, iżda li fih ukoll is-sodisfazzjon tiegħu. Melanie Saliba ilha tarma l-monti ‘l fuq minn għoxrin sena. Ma’ TVM, Melanie wriet ix-xewqa li l-bejjiegħa tal-Monti ma jkollhomx għalfejn jarmaw u jżarma kuljum jekk ikollhom bankarelli permanenti.

Melanie Saliba tbakkar kmieni kuljum biex tarma l-monti kif ilha tagħmel għoxrin sena. Minn ċkunitha kienet tmur tgħin lil missierha li kien jarma l-monti tal-Belt.

Melanie Saliba qalet “dak iż-żmien konna narmaw bid-drappijiet. Konna narmaw quddiem il-Kon Katidral ta’ San Ġwann. Kien żmien sabiħ ħafna. Kelli tilar jiġifieri ta’ tifla, waħdi bid-drapp jiġifieri u nkejjel bil-metru. Kien żmien sabiħ.” Mistoqsija meta bdiet tarma waħedha, Melanie qalet “u mbagħad ħriġt mill-iskola u minn dejjem ridt dan ix-xogħol, allura bdejt mill-ewwel.”

Melanie tgħid li tħobb dax-xogħol għax tiltaqa’ ma’ ħafna nies differenti kuljum. Tammetti iżda li dan ix-xogħol fih ħafna sagrifiċċji, fosthom għax trid tqum kmieni ħafna u jkollok trid jew ma tridx ikollok tiddependi fuq il-burdati tat-temp.

“Sagrifiċċji kbar għax inti qiegħed barra jiġifieri l-elementi tat-temp ġo fik. Jekk is-sajf is-sħana. L-agħar fix-xitwa, il-maltemp jeħodlok saħħtek eh. Ħafna kiefer” qalet Melanie.

Melanie Saliba appellat lill-awtoritajiet biex ikomplu d-diskussjonijiet fuq il-bankarelli tal-Monti.

Melanie qalet “aħna nixtiequ li jkollna kmamar kollha pariġġ, uniformi u jkunu fixed fil-post. U peress li ġol-Belt Valletta u faċċata tal-Parlament, bix-xieraq ikollna xi ħaġa tajba għall-Belt hawnhekk.”

Qalet li kemm ilhom jarmaw ħdejn il-Parlament, il-bejjiegħa tal-monti jħossu li sejrin tajjeb.

Aħbarijiet Oħra
Lokali

“Għajnu Aħmar it-Tonn” jew “It-Tonn tal-Melliħin” kienet l-għajta tas-sajjieda Melliħin li sal-bidu tas-sittinijiet kienu jbiegħu t-tonn li jaqbdu bit-Tunnara. Is-sajd bit-tunnara nqata’ iżda fil-mużew tat-Tunnara fil-bajja tal-Mellieħa, għaqda volontarja Melliħija ikkonservat…

Pulizija

Fl-aħħar xahrejn, l-uċuħ ta’ erba’ Pulizija saru familjari mal-komunità tal-Mellieħa. Ir-residenti laqgħuhom u jqisuhom “ta’ ġewwa”. Dawn l-erba’ uffiċċjali jiffurmaw l-ewwel Community Policing Team fi proġett pilota mniedi mill-Korp. Intervistat…

Malta

Fil-Greċja, hemm madwar 3,500 persuna b’konnessjonijiet Maltin, il-maġġoranza f’Korfu fejn jgħixu Griegi b’nisel Malti li saħansitra jwasslu sar-raba’ u l-ħames ġenerazzjoni. Waqt żjara fil-Greċja, il-President George Vella ltaqa’ ma’ rappreżentanti…

Kisbiet

Imwieled Malta u emigra lejn l-Awstralja 44 sena ilu wara li gradwa mill-Università ta’ Malta dak iż-żmien kienet magħrufa bħala The Royal University of Malta. F’intervista ma’ TVM, il-Professur Stephen…

Aktar